Constantine chungah Bagan coach a lawm lo

Asian Football Confederation (AFC) Asian Cup qualifiers khel tura inbuatsaih mek India coach Stephen Constantine-a'n Mohun Bagan goalkeeper Debjit Majumder chu ram tana khel tura koh a tum loh thu a sawi avangin Mariners coach Sanjoy Sen a thinrim hle.

Kolkata Derby khelh zawh a nih hnu lawkah India coach hi Bagan goalkeeper chungchang hi zawh a ni a, English coach chuan, "March 2016 khan India tana khel turin Debjit hi ka ko tawh a, mah se ram tana inlan aiin Mohun Bagan a ngai pawimawh zawk. India tana khel tura ka koh laiin ram tana inlan chakna a nei lo a, ka koh nawnna chhan tur ka hre lo," tiin I League kal meka che ṭha tak keeper chungchang a sawi.

Constantine thusawi hi ngai thiam loin Sanjoy Sen chuan, "Coach berin player pakhat tana kawngkhar a khar tawh thu a sawi hi a dik lo a, player-te zahawmna leh dikna venghim tura bei ṭhin footballer ṭhin awm ve reng laia sawiah phei chuan a awm lo a ni," tiin Bhaichung Bhutia a kap tel nghal a, Indian legend chu footballer te thlavang hauh ngam loah a puh. Kolkata derby kha Constantine bakah Bhaichung chuan a hmunah a en.

Professional player te tana din Football Players Association of India (FPAI) president hmasa ber Bhaichung chuan, "Kei pawh player ka lo ni tawh a, ram tana koh nih loh hrehawm tur zia hi ka hriatthiampui a ni. Mahse, coach-in team tana ṭha ber tur a ngaihtuah avangin a player thlan dana lo inrawlh hi kan tih tur a ni lo," tiin a lo sawi tawh.