Rosberg-a'n Bottas a fuih

Formula 1 champion a nih aṭanga ni nga hnu leka a chawlh thu puangtu Nico Rosberg chuan amah thlaktu Valtteri Bottas chu inelna khirh leh hautak hmachhawn tura inpeih turin a fuih.

Mercedes team-in tun hnaiah Formula 1 inel­na an thunun hneh hle a, an driver pakhat zawk Rosberg chawl mah se world champion vawi thum ni tawh Lewis Ha­mil­ton an la nei - Bottas tan chona hautak a ni dawn a, amahah beiseina an neih san bawk avangin a tan in­thlahdah a thiang dawn lo.

Kum 31-a upa Ros­berg chuan, "Chiang taka Bottas ka hrilh duh chu hei hi a ni, inelna awlsam hmachhawn inbeisei suh se. Lewis nena inkawp tur an nih avangin thil a awlsam lo hle ang tih ka chiang," a ti.

German driver chuan sawi chhunzawmin, "Le­wis hi khawvela a ṭha berte zinga mi a ni a, boruak sang leh hun har­saah a ṭha zual ṭhin. Chutiang bawkin Valtteri hian pianpui thiamna a nei ṭha ve tawk a, season tharah Mercedes hi champion tura rinkai ber an ni," tiin a team hlui a la dah sang hle.

Kumin Formula 1 season hi March 26 khian tlan ṭan a ni leh tawh dawn a, a hmasa ber atan Aus­tralian Grand Prix an tlan ang. Intlansiak hi 20 awm tura ruahman niin November 26-ah a hnuhnung ber atan Abu Dhabi Grand Prix tlan tur a ni.