Reds-in Saints an hneh: City nen an inkarah point khat!
Premier League champion hre turin season tawp nghah thlen a ngai dawn - Liverpool chuan Thawhlehni zan khan 2-1 in Southampton an hneh a, champion beiseina an chhi nung ve zel.
Mualneitu Saints hian Nathan Redmond hmangin goal hmahruai an khung a, mahse, Liverpool tan Takumi Minamino leh Joel Matip ten an chhanglet a, 2-1 in hnehna an chang.
Liverpool-in hnehna an chan avangin hmahruaitu Manchester City an thlauhna chu point khat chiah a ni leh ta a, match khat ve ve chiah khelh tur an nei tawh bawk.
City tan champion turin Aston Villa hneh a ngai a, Liverpool tan champion turin Wolverhampton Wanderers hneh a, Villa-in City an chelh a ngai bawk - Liverpool fan-ten Steven Gerrard lam an hawi e.
Pressure a sang
FA Cup-ah Liverpool an champion a, mahse, Chelsea an hnehna inkhelah hian minute 120 zet an inkhel a, hliam tenau vangin Andy Robertson lakchhuah a ngai a, Mohamed Salah leh Virgil van Dijk an inhliam bawk.
Reds an inkhelh chauh avangin player inhliam lo pawh chawlh hahdamtir an mamawh a, Liverpool-in champion beisei chhunzawm turin Saints lakah chak ngei ngei an mamawh tho bawk si!
Jurgen Klopp tan a luhai thlak ang tih a chiang a, mahse, German coach hi hlau leh khur chunga kir leh chi a ni lo - huaisen takin thutlukna a siam a, Chelsea laka bul ṭan aṭangin player pakua a thlak!
Player inhliam bakah captain Jordan Henderson, Thiago Alcántara, Luis Diaz, Naby Keïta leh Robertson te pawh bench-ah dah an ni a, Sadio Mane chu squad-ah pawh a awm lo.
Rin loh karah
Klopp-a'n huaisen takin thutlukna a siam a, mahse, beisei angin thil a kal lo. Rin loh lam aṭangin Saints an lo lang a, Redmond chuan minute 13-naah ṭha zeta ball a lakluh hnuin, goal chung kil sirah a thlawh lut.
Saints-in khelh chhan nei tawh lo mah se coach Ralph Hasenhüttl-a'n Liverpool lakah point hlawhchhuah ngei a tum a, 5-4-1 formation rawn hmangin tlarhnungah player a rem khat a, goal an la khung hmasa zui!
European football-a team hmuhnawm ber pawl an ni a, mahse, Saints laka Liverpool squad enin an 'comeback' thei ang em, tih zawhna a awm a, a chhanna hmu turin nghah rei a ngai lo thung.
Goal an chhuah aṭanga minute 17-na lekah Takumi Minamino a inlar a, Japanese forward hian chance pek a nih chuan danglamna a thlen thei tih pholangin chiang zetin a pet goal - tun season-ah target-a shot vawi 11 a nei a, vawi 10 goal a khung!
A la tawk lo
Minamino-a'n goal a khung hnuah Reds-in an zia tak tak an chhuah chho ṭan a, Saints an nawr tawm hneh hle - Reds tan hian Diogo Jota, Harvey Elliott leh Curtis Jones ten chance an nei leh vek a, mahse, an chhawr lo.
Liverpool-in chak ngei an duh a, goal hmaah an vanduai rei lo. Minute 67-naah defender pasang Matip chuan tun season-a a goal thumna a tauh lut a, 2-1 in Liverpool a chakpui.
Reds tan Mane leh Salah awm loh zanah Roberto Firmino-a'n zo takin a mawhphurhna a hlen a, Brazilian forward che vel a hmuhnawmin, tun hnaiah hliam vangin talbuai mah se a la thiam reng tih a pholang a, lakchhuah a nihin fans lamin ding chungin an zahna an lantir hial - a goal khung offside vangin pawmsak a ni lo.
Fak hlawh tawk lo Matip a rintlak reng a, a dinpui Ibrahima Konate-a'n world class player ni turin theihna a nei tih hmuh turin a awm leh ta bawk. Player vanduai Joe Gomez erawh a inhliam leh tawh a, he thu buatsaih lai hian a dinhmun tak a sawi theih loh.
A tih theih!
Liverpool legend Steven Gerrard-a enkawl Villa-in City an chelh a, Liverpool an chak bawk chuan Jurgen Klopp leh a naute an champion thei dawn - Gerrard hian Reds player ni chunga a tih theih loh hi club dang coach ni chungin a ti thei ang em? Hunin a hril dawn.
Klopp chuan, "City an tawlhthluk ka ring lo - mahni mualah an inkhel dawn a, an mikhual tur Villa hian Ningani zanah tlak hlau Burnley an hmachhawn dawn bawk si a, Villa tan a harsa ang," a ti.
Villa hian zanin dar 12:30-ah Burnley an mikhual dawn a, Pathianni zan dar 8:30-ah City an lenchilh zui dawn - a awlsam dawn lo tih a chiang. Klopp chuan, "Mahse, hei hi football a ni a, kum 2019-a City an champion pawh khan min daidantu chu 11 millimetres chauh kha a ni.
"Miin champion tura min duh a nih chuan hnehna kan chan phawt a, Villa-in City laka point an hlawhchhuah a ngai. A thlen a beiseiawm loh a, mahse, thil tih theih erawh a ni - a bak sawi dan a awm lo," a ti a, beisei a la nei.