Supreme Court-in AIFF enkawl tur committee a ruat

India rama football thuneitu sang ber All India Football Federation (AIFF) chuan hun rei tak chhung inthlan huaihawt duh lo mahse, an huaihawt ngei a ngai tawh dawn.

Nimin khan Supreme Court chuan AIFF inrelbawlna kalpui turin Committee of Administrators (CoA) a din a, he pawlah hian judge AR Dave chu hotupa berah an ruat zui.

Justice DY Chandrachud, Surya Kant leh PS Narasimha te chuan AIFF chu National Sports Code mila kal turin an ti a, Dave bakah hian chief election commissioner hlui Dr SY Qureshi leh the Indian Football Team captain hlui Bhaskar Ganguly te chu CoA-ah an ruat tel bawk.

Supreme Court chuan CoA chu AIFF enkawl hna thawk nghal turin a hriattir a, Indian FA constitution thar chu National Sports Code mila a kal theih nan court pui turin a hriattir a ni.

April thla khan Union Sports Ministry chuan Supreme Court hnenah AIFF hi a lo hek tawh a, AIFF president Praful Patel chuan President a nih theih hun chhung a pelh tawh avangin President a ni thei tawh lo, an ti.

Praful Patel hian AIFF President hna hi ṭum thum a chelh tawh a, term khat hi kum li zel atan a ni - term thum aia tam President a nih theih loh avangin inthlan huaihawt a hun tawh.

Mahse, December 2020-a Praful Patel-a term a tawp khan, AIFF chuan Supreme Court-a an pawl inkaihhruaina dan ngaihtuah mek chu chhuanlamah an hmang a, SC hnenah hian AIFF hruaitu nih chhunzawm an dil.

October 2017 khan Delhi High Court chuan December 2016-a AIFF inthlan chu National Sports Code dan zawm loa puhin a pawm lo a, mahse, AIFF hi Supreme Court lamah an zualko.

India ram rorelna sang ber hian chief election commissioner hlui SY Qureshi leh India goalkeeper hlui Bhaskar Ganguly-te chu AIFF constitution thar ruahman turin a tizui a, January 2020 khan an thehlut tawh niin Ganguly chuan a sawi a, Thawhlehni khan Ganguly chuan SC chu an constitution ruahmante chu pawm turin a ngen a ni.

Sports Authority of India chuan AIFF hi a inrelbawlna fel lo leh, khelmuala result hmuh tur awm lo avangin a lo hrek tawh a, kumina sports association hrang hrang sum dawn tur an puanzarah pawh AIFF hi vaibelchhe nga chiah an pe!

Tun hnai kum li chhunga AIFF sum dawn a tlakhniamna hi 85% a tling hial a, SC thuchhuak anga CoA-in AIFF kaihhruai hna a thawh rih mai pawh hi a duhtu an tam zawk ang.

CoA hian AIFF inthlan neih dan tur pawh an buaipui dawn a, phai media ṭhenkhat tarlan dan chuan SC hian July 31 hmaa inthlan nei turin AIFF hi a hriattir a ni.