Miami Heat an che fuh hmasa

NBA Eastern Conference Finals khelh ṭan a ni a, game 1-ah Miami Heat chuan Boston Celtics 118-107 in an hneh. Heat hian best of seven series-ah 1-0 in hma an hruai - Zirtawpni zingah game 2 an khel chhunzawm lehnghal ang.

Nimin zing FTX Arena, Miami-a inkhelah Celtics hi an che fuh hmasa zawk, quarter hmasa pahnihah an chungnung ve ve; chawlhlawk laiin mikhual team lamin 76-64 in hma an hruai fal thei hial.

Mahse, quarter thumna bikah Heat lamin 39-14 zetin an lehthal thei, quarter thumna bikah hian Jimmy Butler-a'n point 17 zet a nei, inkhel pumpuiah point 41 nei zuiin an chakna hnar pawimawh a ni.

Tun season playoff chinah Burtler-a'n match khata point 40 neih tlin vawi nga a nei tawh. Heat player awm tawh zingah Dwyane Wade (vawi sarih) chiah tluk loh a nei, kuminah hian record nihrual bakah khum theihna kawng a inhawng.

Kum 32 mi, 6ft 7 in a sang Butler chuan, "Point 40 neih tlin hi ka rilrua thil awm ber a ni hran lo, nuamti taka basketball khelh hi ka duh ber chu a ni mai, ṭhiante puihna zara hming langsar mai ka ni," a ti.

Boston tan an star player Jayson Tatum-a'n point 29 a nei, tam thawkhat viau mah se team chak pui nan a tawk zo lo. Rebound vawi riat a lak bakah assist vawi ruk a nei bawk a, Jaylen Brown chuan point 24 a nei ve bawk.

Celtics coach Ime Udoka chuan, "Match hmasa bera chak theih chu duhthusam a ni, mahse kan ti thei ta si lo. Game khelh hmabak kan la neih atan zirlai ṭha tak kan zir niah ka ngai," a ti. Tatum pawhin game 2-ah chuan mimal taka hmasawn a ngaih thu a sawi bawk.

Eastern Conference Finals
May 18, Nilaini
Game 1: Miami Heat 118 - 107 Boston Celtics
May 20, Zirtawpni
Game 2: Miami Heat 06:00 AM Boston Celtics
May 22, Pathianni
Game 3: Boston Celtics 06:00 AM Miami Heat
May 24, Thawhlehni
Game 4: Boston Celtics 06:00 AM Miami Heat
(Miami hian series-ah 1-0 in hma an hruai)

Western Conference Finals
May 19, Ningani
Game 1: Golden State Warriors 08:30 AM Dallas Mavericks
May 21, Inrinni
Game 2: Golden State Warriors 08:30 AM Dallas Mavericks
May 23, Thawhṭan
Game 3: Dallas Mavericks 06:30 AM Golden State Warriors
May 25, Nilaini
Game 4: Dallas Mavericks 06:30 AM Golden State Warriors

Note: Best of seven series hmanga chak zawk zawn a ni a, chak turin game li lak a ngai. Game hmasa pali fixture tihlan phawt a ni.