Djokovic a chungnung rei ta

Mipa tennis ranking-ah Novak Djokovic chuan a chung ber dinhmun a la luah, world number 1 a nih hun chhung hi chawlhkar 370 zet a tling ta, a chesual viau a nih loh chuan a dinhmun hi a la hum chho zel dawn ni pawhin a lang.

Season tir lamah inkhel thei lo mah se Djokovic hi tunah chuan a inkhel thei leh tawh. Kar hmasa khan Italian Open nomawi a chawi fel leh der tawh, world number 2 Daniil Medvedev-a'n lo hnaih chilh hman mah se a kal fal leh dawn.

Rafael Nadal erawh tournament a khelh hnuhnung pahnihah beisei a phak lo, palina aṭangin panganaah a tlahniam. A ranking a hniam avangin French Open khelh hunah seeded a ni sang dawn lo, semifinal hmain player ṭha a hmachhawn a ngai dawn.

Serbian star Djokovic hi number 1 ni rei thei ber a ni a, amah hnaih bertu Roger Federer (310 weeks) ai pawhin kar 60 zetin a sang fal tawh. Pathumna chu Nadal (209 weeks) a ni thung, player dang nena khaikhin chuan anni pathum hi an ropui hle.

Tun hnaia khel ṭha thei tak Carlos Alcaraz chu paruknaah a awm. Spanish rawlthar hi kum 19 mi chauh la ni mah se khelmual chhungah a puitling tawh, tun hnaiah nomawi pahnih a chawi theih avangin French Open khelh hunah pawh rinkai a ni phak dawn.