Everton leh Burnley - An him thei dawn em?

Premier League tawp zan thlen hmain Everton an him thei a, Burnley pawh dinhmun ṭha takah an ding thei. Frank Lampard-a hote hian zanin dar 12:30 hian Crystal Palace an mikhual dawn a, Goodison Park-ah an him a nih chuan an boruak tawn chu champion boruak tawn aiin a nep lo ang. Burnley pawhin Aston Villa an tlawh dawn a, Clarets hi an chak a nih chuan relegate turin Leeds United dinhmun a derthawng ber ang.

Record nei ṭha Toffees
Everton hi club naran an ni lo a, relegation battle zinga an tel pawh hi an inhmeh lo. History bu keu let chuan Toffees hi top flight football khel rei ber an ni a, season 119 chhung an khel tawh. Everton hnuaiah hian Aston Villa (108), Liverpool (107), Arsenal (105), Manchester United (97) leh Manchester City (93) te an awm.

Everton hian season li chiah top flight football khelh loh an nei a, chungte chu 1930–31, 1951–52, 1952–53 leh 1953–54 season te kha a ni a, Premier League-ah an la khel kim vek. Top flight football khelh zawn reiah erawh Arsenal chiah an tluk lo a, Gunners hian 1919-20 season aṭangin an la khel char char.

Amaherawhchu nomawi chawi kawngah erawh Toffees hian tluk loh an ngah thung. League-a an champion hnuhnung ber chu 1986-87 season kha a ni a, FA Cup-ah erawh 1994-95 season khan an champion thung. Chutihrualin engtiklai pawhin club vantlang an ni thei reng a, tun season-a an sum hman dan thlir pawhin Europe inelna tel tum zinga awm tur an ni.

Beisei pha lo
Everton manager Carlo Ancelotti-a'n Real Madrid a pan a, Italian manager ho hian 10-naah an awm. Season ṭantirh khan manager langsar Rafael Benitez an lalut a, Spanish manager hi Toffees hmelma Liverpool manager hlui a nih avangin sawiseltu pawh an ṭhahnem hle.

Benitez hnuaia an match hmasa parukah match li an chak a, chak loh leh inhnehtawk vawi khat ve ve an nei bawk. Season bul ṭan chhe lo mah se Benitez hnuaiah an khel ṭha lo zui a, an chak loh deuh reng avangin January thla laihawl khan an ban.

Club legend Duncan Ferguson-a'n January thla chhung a enkawl zui a, manager atan Frank Lampard an lakluh bakah thlasik bazarah hian Vitaliy Mykolenko, Nathan Patterson, Dele Alli leh Donny van de Beek te lalutin pound maktaduai 70 bawr vel an hmang.

Lampard hnuaiah 4-1 zetin Brentford hneh nghal mah se league lamah erawh a ngai tein an che chhe zui a, mahse Toffees hian Newcastle United insiamṭhat hnu, Manchester United, Chelsea leh Leicester City te an hneh avangin him thei dinhmunah an ding.

Inkhel tur chu
Everton-in an match hnuhnung berah 3-2 in Brentford an inlehthaltir a, him turin point thum a la ngaih phah. Harsatna belhchhah turin Bees lakah Jarrad Branthwaite leh Salomon Rondon te hnawhchhuah an ni a, chhawr theih an ni dawn lo.

Lampard-a'n bul ṭan turin tu nge a thlan ang tih hi a pawimawh chu a ni a, chiang saa ngaih erawh tlarhma lama awm pathum Richarlison, Dominic Calvert-Lewin leh Anthony Gordon te an ni. Squad a chhah tawh loh avangin Dele Alli leh Van de Beek te pawhin bench aṭangin khelhna chance an nei thei ang.

Chutihrualin Toffees khingpui tur Crystal Palace hi thawm nei ring lo mah se Patrick Vieira hnuaiah game nghet ṭha tak an nei a, match li chhung chu hneh loh an tawng tawh lo. Tlarhmaah Wilfried Zaha an nei a, Manchester United forward hlui hi a khelh ṭhat chuan danglamna thlen theitu a ni a, Everton tan ven uluk a ṭul ang.

Clarets ve thung
Burnley-in April 15-a manager Sean Dyche an ban khan mak tih a hlawh a, amaherawhchu manager lailawk Mike Jackson hnuaia result an neih ṭhat avangin Premier League khelh beiseina sang tak an nei leh hial.

Clarets hi Jackson hnuaia an match hmasa berah West Ham nen 1-1 in an inhnehtawk a, penalty an hlah avangin point hnih an hlohah a ngaih theih zawk. Hemi hnu hian Southampton, Wolves leh Watford te an hneh a, hmun himah an awm hman.

Mahse match hnuhnung pahnihah Aston Villa leh Tottenham te an hneh lo a, tla thei dinhmunah an ding leh tawh. Clarets hi Leeds aiin an goal difference a ṭha a, hemi a nih avang hian point khat chauh pawh himna a ni thei. Zanin hian si ruk lain Burnley an thawk chhuak dawn a, tun thlatira an muala an hneh loh Steven Gerrard-a hote chu Villa Park-ah hneh an tum dawn a ni.