Semifinal-ah Tuichangral an lut
Tuichangral chuan Hunthar hnungzuiin Zothan Autoworks Pro Volleyball League semifinal an lut. Knockout stage lut tur hian Thawhlehni zan khan an khingpui Durtlang North chu 3-1 in an hneh.
R. Dengṭhuama Indoor Stadium, Mualpuia inkhelah Tuichangral hian set hmasa ber hloh mah se huaisen taka tho chhuakin 21-25, 25-21, 25-23, 25-20 in hnehna an chang, match thum an khelh tawhah vawi hnih chakin table-ah pahnihna an ni.
Tuichangral hian hma-hruaitu Hunthar an phak lohna chu point khat chiah a ni a, league match khelh hmabakah Chhinga Veng Spikers an la tum dawn, an sawp thei a nih chuan hmahruaitu nih theihna kawng a la inhawng.
Durtlang North an hneh theih nan Sahil Kumar a khel ṭha. Tun inelna a hmachhawn china a khelh ṭhat ber ṭum tawngin, point 50 teh meuh a hlawh chhuak - a phu ang ngeiin D3 Business Player of the Night atan thlan a ni.
Chak lo Durtlang North erawhin tlang turin an nghah leh rih a ngai dawn; Tuichangral hi hneh se la chuan semifinal lut fel thei an ni, an chak loh avangin semifinal hmun tichiang tur chuan TNT lakah an result an ngaihchan leh phawt a ngai dawn.
Zanin hian a hmun ngaiah inkhel a awm leh dawn. Semi-final lut chiang tawh Hunthar leh TNT an inhmachhawn dawn. May 20, Zirtawpni zanah champion lai Spikers leh Tuichangral an intum leh bawk ang - Chhinga Veng hian chak ni hmel an la hmu lo.
May 17, Thawhlehni - Mipa
Tuichangral 3 - 1 Durtlang North
(21-25, 25-21, 25-23, 25-20)
D3 Business Player of the Night: Sahil Kumar, Tuichangral
May 19, Ningani
Hunthar 08:00 PM TNT
May 20, Zirtawpni
Chhinga Veng Spikers 08:00 PM Tuichangral
May 21, Inrinni
Durtlang North 08:00 PM TNT