French Open khel tur Nadal

Rafael Nadal chuan French Open a khelh tur thu a tichiang, tun hnaiah ke phah hliam vangin buai deuh mah se clay court inelna lian khel turin Paris khawpui a pan tur thu a tichiang - tennis ngainatute tan thu lawmawm a ni ang.

Italian Open khelh zawh takah Nadal hi a inhliam, hliam na tak ni lo mah se a inkhel erawh a ti khaihlak. Spanish star hian Paris-ah pawh doctor a hruai tur thu a sawi a, 100%-a dam erawh a la ni lo deuh tih a hriat theih.

Kum 35 mi Nadal chuan, "Paris khawpuiah kan inhmu dawn nia," tiin a ziak a, vawi 13 zet a champion tawhna hmunah hian a inkhel thei a nih pawhin rinkai ber a ni phak lo mai thei, player zuamawm erawh a ni chuang lo ang.

French Open bikah chuan Nadal hian vawi thum chauh chak loh a la nei, nomawi 13 zet a chawi tawh. Season hmasa khan world number 1 Novak Djokovic a ngam lo, kuminah pawh anni pahnih hi inel leh tura ngaih an ni.

Nadal a inlan theih dawn lai hian Gael Monfils erawh a inlan thei dawn lo. Tualchhung tlangval hi a keartui dinglam a hliam a, a hliam zai hi a la dam fel hman loh avangin a chawlh rih a ngai dawn.

World number 22 Monfils chuan, "Vanduai thlak takin Lyon Open leh French Open ka khel thei dawn lo. Mahni ram ngeia tournament khelh nawmzia ka hria, chumi ka ti thei lo chu pawi ka ti takzet," tiin a sawi.

Kum 35 mi Monfils hian 2008 French Open-ah khan semifinal a lut a, 2016 US Open-ah a thiam pali zingah a tel bawk. Player ṭha pangngai tak ni mah se Grand Slam final erawh a la thleng ngai lo thung.