Chelsea awmna tur 3-na?

Chelsea chuan zanin dar 12:30 hian Stamford Bridge-ah Leicester City an mikhual dawn a, Thomas Tuchel-a hote hian point an hmuh hrim hrim chuan Premier League-ah pathumna an ni dawn. Arsenal-in Newcastle United an hneh loh khan Blues hian Champions League an khel dawn tih a chiang a, an tih theih sang ber chu pathumna a ni.

Blues tan FA Cup final hnua an match hmasa ber a ni dawn a, Liverpool lakah nomawi pahnih an chân avangin an boruak ṭhat lai ber a ni lo. Tuchel-a hote hi League Cup leh FA Cup final-ah penalty shootout hmangin an tlawm ve ve a, season ṭha tak hmang thei tur khan season naran tak an hman phah a ṭul dawn a ni.

Chelsea hi khelmual chhung leh pawnah an buai mek. Russia-in Ukraine a run avangin club neitu Roman Abramovich chuan club a hralh a ṭul phah a, neitu thar Todd Boehly nei tawh mah se an inlei dan chungchangah fel lo a la awm.

Khelmual chhungah pawh nghawng lian tak a nei a, defender pahnih Andreas Christensen leh Antonio Rudiger te an chelh thei dawn lo. Danish defender hian Barcelona a pan dawn a, FA Cup final-ah pawh a inhnukdawk a, German defender hian Real Madrid a pan thung dawn.

Chutihrualin Blues hian King Power Stadium-ah zanina an hmachhawn tur Foxes hi 3-0 in an sawp thei a; Rudiger, N'Golo Kante leh Christian Pulisic ten goal an khung. Tuchel-a hoten an mualah hneh nawn theih an inbeisei ang.