Real-in champion nomawi an hnaih!

Tuna La Liga table ang hian season tawp se Real Madrid chu champion tur an ni. Aw, i chhiar dik - Real-in La Liga table chung ber an luah ta a, an hnuaiah Barcelona an awm!

Pathianni zan khan La Liga inkhelah Real Madrid hian mikhual tlangnel zia chhuahin Real Sociedad chu khualmualah 2-1 in an hneh a, Barca nen an point hmuh zat a inang. 

Barca nen an point hmuh zat inang mah se Real hi head-to-head ah an ṭhat zawk avangin table chung berah an awm a, league nomawi chawi turin an kutah engkim a innghat ta. 

Real tan hian Sergio Ramos leh Karim Benzema chuan goal khat ve ve an khung a, Sociedad tan Mikel Merino chuan goal khat khung ve mah se si phurh an sut zo lo. 

Real pahnih inhmachhawnah Madrid hi champion tum an ni a, Sociedad hi season thara Champions League khelh tum an ni thung - tum in ang lo, chak mamawh ve ve an ni.

Goal hmasa ber hmu tur erawhin second half nghah thlen a ngai a, minute 50-naah Sergio Ramos chuan penalty hmangin goal hmahruai hi a rawn khung. Tun season inelna hrang hrangah match 37 khelin goal kua a khung ta.

Spanish defender hian Barcelona legend Ronald Koeman (67 goals) khumin La Liga-a goal khung hnem ber record a siam a, Sevilla leh Real tan season 18 khelin match 486-ah goal 68 a khung - Koeman erawhin goal 67 khung turin league match 192 chiah a mamawh thung. 

Ramos-a penalty pet luh hi Vinicius Jr hlawhchhuah a ni a, kum 19 mi Brazilian rawlthar hi khelmuala minute 90 hun a hman chhungin a nung leh pek hle - a chanchin kan la hre dawn chauh. 

Madrid an chak a, 'Real vanduai,' tia kan sawi erawh Sociedad zawk an ni - coronavirus vanga La Liga chawlh a nih hnua league ṭan leh a nihin match thum an khel tawh a, an chak zo lo vek!

Hei vang hian top four aṭanga petchhuahin an awm a, table lamah chuan parukna dinhmun an luah leh tawh. Madrid lakah pawh chak ngei an tum a, mahse vanneihnain an lam a ṭang lo. 

Manchester United rawlthar duhawm ni ṭhin Adnan Januzaj chuan bench aṭanga luhtir a nih hnuah si phurh a sut niin a inngai a, mahse referee-in kum 25 mi attacking midfielder goal khung hi a pawm duh lo - an vanduai takzet. 

Referee hian Janujaz-a goal khung lai hian Merino chu a offside niin a ngai a, Spanish midfielder hian ball a tawk fuh lo - mahse keeper Thibaut Courtois khaw hawina tur a hliah tiin referee hian 'play'-ah a inrawlh niin a ngai a, offside vangin goal hi a pawm lo. 

Minute 70-na a ni a, Sociedad lawm lohna belhchhah turin Karim Benzema chuan Real goal hnihna a rawn khung. French striker hian Federico Valverde-a ball pek chu a dar hmanga siam remin goal-ah a chhuih zui a, 2-0 a ni. 

Benzema goal khung hi handball avangin VAR hmanga ennawn a ni a, hei erawh Madrid lawm nan referee chuan goal-ah a pawmsak - kum 32 mi striker hian tun season La Liga-ah match 29 khelin goal 17 a khung tling ta. 

Mualneitu team tan Merino chuan minute 83-naah goal khat a rawn khung ve leh a, goal dang erawh an neih theih tak loh avangin an tlawm - Real tana chanchin lawmawm lo awmchhun chu Ramos inhliam kha a ni. 

Ramos hi minute 60-naah a khup hliam vangin lakchhuah a ngai a, Nilaini zan dar 1:30-a Mallorca an mikhual hunah inlan thei lo tura ngaih a ni. Real boss Zinedine Zidane chuan a player hliam hi na tak a nih loh hram a beisei thu a sawi a, he thu buatsaih lai hian a hliam dinhmun dik tak an la sawi lo. 

Real Madrid-in hnehna an chan leh tak avangin Sevilla laka chak zo lo Barcelona tan nomawi humhim turin kawng a hautak sawt a, chak chhoh zel bakah Real tawlhthluk an chan tel a ngai ta. 

La Liga-ah hian European league dang ang lo takin goal difference aiah head-to-head (an lo intum tawhna) chu en a ni a, tun season La Liga-a vawi hnih an inhmachhawn tawhah Barca aiin Real an chungnung zawk. 

December khan Nou Camp-ah team pahnih hi intawngin goal awm loin an ṭin a, March 1 khan a vawi hnih nan Santiago Bernabeu-ah an intawng nawn - mualneitu Real hi 2-0 in an chak. 

Barcelona hian zanin dar 1:30-ah Athletic Bilbao an mikhual dawn a, Spanish champion nih an duh chuan tawlhthluk a thiang tawh lo tih an hria ang.