Championship playoff final khel tur Forest
Season thara Premier League khel duh tan hmun ruak pakhat a la awm a, hmun ruak pakhat chan tumin Nottingham Forest chuan kawng dik an zawh zel.
Thawhlehni zan khan Championship playoff semifinal second leg-ah Forest hi 2-1 in Sheffield United lakah tlawm mahse, inkhel hmasa nena belhkhawmin 3-3 a ni a ni a, penalty hmangin 3-2 in an tlang.
Forest tan Brennan Johnson chuan goal hmahruai khung mahse, Sheffield hian Morgan Gibbs-White leh John Fleck hmangin an chhanglet. Penalty hmangin chak zawk zawn zui a ni a, Forest keeper Brice Samba chuan vawi thum ngawt save ṭha tak nei chungin a team a chhanhim a, 3-2 in an chak.
May 29, zan dar 9:00-ah Championship playoff final khelh a ni dawn a, Forest hian Premier League kai inchuhin Huddersfield Town an hmachhawn ang. Final-a chak zawk hi a tlem berah pound maktaduai 130 veli an hausak belh dawn.
Thawnthu danglam
Forest tan inkhel ṭantir aṭangin keeper Brice Samba a langsar nghal a, French midfielder Iliman Ndiaye-a chance duhawm chu ṭha takin a dansak nghal - Sheffield hian inkhel an thunun chhunzawm.
Mahse, minute 19-naah Forest an rawn lang zawk - counter attacking football rang tak hmangin Sheffield an nawr let a, minute 19-na lekah Johnson chuan ṭha zetin goal a khung.
Brennan Johnson tan tun season inelna hrang hranga goal 19 a khungna chiah a ni a, playoff semifinal match hnihah goal a khung ve ve bawk - final-a Forest an luh nan a thawhhlawk hle.
Thil danglam ve tak chu, Johnson-a pa David Johnson chuan kum 2003 khan Forest tan tho playoff semifinal match hnihah goal a lo khung tawh a, ani erawhin final-ah a team a hruai thleng lo thung.
A chhanletna
Championship playoff semifinal boruak a 'hot' a, Blades (Sheffield sawina) manager Paul Heckingbottom chuan 'thow-in' tura ball lak tum, Forest defender Djed Spence chu ball-in a dulah a lo nawr a, yellow card chiah pek a ni chu a vannei hle.
Sheffield hian second half-ah na takin an nawr let a, second half ṭan aṭanga minute hnihna lekah Morgan Gibbs-White chuan si phurh a rawn sut - mahse, first leg ngaihtuah tel a ngai a, an la tlang lo cheu.
Hun tawp nan minute 15 a la awm tihah John Fleck chuan chakna goal a khung a, first leg nena belhkhawmin 3-3 a la ni cheu - team pahnihin chak tumin an innawr tawn a, mahse, goal dang a luh belh lo.
Extra time-ah pawh team pahnihin chak tumin innawr an tum a, mahse, chance hlauhawm tia sawi tur an nei thei lo ve ve. Penalty hmangin a chak zawk chinfel a ni a, Forest an vannei ta zawk.
A hming Samba
Penalty-ah Forest keeper Brice Samba chu player langsar a ni - Sheffield tana Ollie Norwood, Conor Hourihane leh Morgan Gibbs-White te pet chu a dang vek a, 3-2 in an chak.
Forest tana pettu zingah Joe Lolley-a'n penalty a thlawh over tih loh chu midang zawngin an pet goal vek thung a, a tawpah Congolese keeper Samba chet ṭhat zarzoin Forest an tlang.
Inkhelh zawhah Forest fans tam takin chak lawmin khelmual an tlan lut a, fans zinga phur fal pakhat chuan mawi lo takin, hliam vanga inlan thei lo Sheffield United striker Billy Sharp a bei.
FA chuan he fan chet dan hi an chhui zui thu an sawi a, Forest chuan Sharp leh Sheffield hnenah ngaihdam dilin, fan chu damchhung atan an hrem tur thu an sawi a, hetihlai hian Nottinghamshire Police chuan mi pakhat an man tawh thu an sawi.
Sawi nawn leh rawh
Forest leh Sheffield inkhel hian thawnthu ngaihnawm tak a keng tel a, chu chu an manager pahnih chanchin a ni - Forest coach Steve Cooper hian September 2021 khan club hi a zawm ve chauh.
Swansea boss hluiin Forest a zawm hian table mawngphah an luah a, an league match hmasa pasarih aṭangin point khat chiah an nei. Mahse, Cooper-a'n a enkawl aṭanga chhiarin Championship-ah anni aia point hmu hnem an awm lo a, table-a palina ni chungin season an khar.
Sheffield boss Paul Heckingbottom hnathawh pawh hi a ropui hle - November khan Slavisa Jokanovic thlakin Sheffield a enkawl ṭan a, hetihlai hian Slavisa hnuaia an league match 19-ah Blades hi vawi thum chiah an chak.
Mahse, kum 44 mi Heckingbottom-a'n a league match hmasa 13-ah vawi khat chiah tlawmpuiin Blades zinkawng a thlak danglam a, final khel phak ta lo mah se playoff semifinal khelh phak ringawt pawh hi a enkawl tirh nena ngaihtuah chuan ropui tak a ni.
May 13, Zirtawpni Zan
Luton Town 1 - 1 Huddersfield Town
LUT: Sonny Bradley 30'
HUD: Danel Sinani 12'
May 14, Inrinni Zan
Sheffield United 1 - 2 Nottingham Forest
SHU: Sander Berge 90+1'
NOT: Jack Colback 10'; Brennan Johnson 71'
May 16, Thawhṭanni Zan
Huddersfield Town 1 - 0 Luton Town
HUD: Jordan Rhodes 82'
*Inkhel pahnih belhkhawmah 2-1 in Huddersfield an chak
May 17, Thawhlehni Zan
Nottingham Forest 1 - 2 Sheffield United
NOT: Brennan Johnson
SHU: Morgan Gibbs-White 47'; John Fleck 75'
*Inkhel pahnih belhkhawmah 3-3 a ni a, penalty hmangin Forest hi 3-2 in an chak.
May 29, Pathianni Zan - Final
Huddersfield Town 9:00 PM Nottingham Forest