Srikanth-a'n second round a lut

Kidambi Srikanth chuan India tana Thomas Cup a chawi hnuah tournament a khel zui. Nimin khan Thailand Open khelin, a khingpui nen inhnetawk taka an inbeih hnuah 18-21 21-10 21-16 in a chak.

Brice Leverdez hneh turin Srikanth-a'n minute 49 chhung hun a hmang a, awlsam takin hnehna a chang bik lo. BWF Super 500 tournament-ah India tlangval hi seeded pariatna pek a ni a, champion beisei ngam zinga mi a ni ang.

Mipa singles inkhel dangah Aakarshi Kashyap erawh Michelle Li lakah 13-21, 18-21 in a chak lo, hneh nei loin inelna a mangṭha. Mixed doubles pair - B Sumeeth Reddy leh Ashwini Ponnappa te pawh an match hmasa berah an chak lo.

Hmeichhe singles lamah Saina Nehwal a chak lo. London Olympic bronze medalist hian Kim Gaeun lakah bul a ṭan fuh a, game hmasa ber pawh a la. Mahse, Korean player nen game thum an khelh hnuah 11-21, 21-15, 21-17 in a chak lo zawkah a ṭang.

Player ṭha PV Sindhu leh HS Prannoy te pawhin nizan khan an match hmasa ber an khel a, result erawh kan hre hman lo a ni.