Flick-a'n Ter Stegen chawlh a pe

Kumin kum tawpah FIFA World Cup khelh a ni dawn a, heti chung hian June thlaah player-te tan chawlh a awm dawn lo. Europe ramte chuan June thla chhung hian Nations League group match an khelh tura match ruka match li chu an an khel dawn.

Germany chu group 3-ah Italy, England leh Hungary te nen an awm ho a, group ngaihnawm ber zinga mi an ni. Amaherawhchu Nations League hi competitive match ni mah se World Cup leh European Championship te nen huang khatah an dah lo a, player-te pawhin hahdam an thlang zawk.

Germany goalkeeper Marc-André ter Stegen chuan, "National team-a tel hi nuam ka ti a, thlan ka nih hian ka lawm ṭhin. Chutihrualin season thum chhung chu chawlh mumal nei loin hun ka hmang tawh. National coach nen hun rei tak kan inkawm hnuah ka ngaihdan min ṭawmpui a, chawlh ka duhna min remtihsak," tiin June thla chhunga Germany tana a inlan loh tur thu a sawi.

Die Mannschaft hian May 23-27 chhung hian Marbella-ah Nations League atan an inpuahchah ṭan dawn a, May 30 aṭangin Herzogenaurach-a adidas “World of Sports”-ah an inkulh ang.

Germany hian coach thar Hansi Flick-a hnuaiah harhtharna an chang a, match hnuhnung bera Netherlands nen friendly match-a an inhnehtawk tih loh chu an la chak vek. Nations League-ah Flick-a hoten fiahna tak tak an hmachhawn ang.