A lo kirnaah Medvedev a chak lo

Hliam vanga kar ruk a chawlh hnuah Daniil Medvedev a inkhel leh thei ta. Tennis court-ah lo kir mah se beisei anga result ṭha erawh a nei nghal lo, world number 2 hi Richard Gasquet hneh loin Geneva Open a match hmasa berah a tla.

Thla hmasa khan Medvedev hi tila ril tla vanga zai a ni. Thawhlehni zan inkhelah tihsual a ngah a, a service ṭha tak ang kha a la nei thei lo bawk, a khingpui lakah hian 6-2, 7-6 (5) in a chak lo zawkah a ṭang.

Medvedev hnehtu Gasquet tan erawh chanchin lawmawm a ni thung. Tun hmain Roger Federer a lo hneh ve zauh tawh, a hnu lamah world number 1 leh 2 player te vawi 36 hmachhawn leh tawhin a chak lo vek, tunah chuan ranking sang pahnihna chin a hneh ve leh ta.

Gasquet hian a match lehpekah chuan Kamil Majchrzak a hmachhawn dawn. French Open inbuatsaihna tournament inkhel dangah hian Majchrzak-a'n Marco Cecchinato 6-2, 6-3 in a lo hneh ve thung a ni.

Kum 26 mi Medvedev chuan, "A nihna tak sawi chuan clay court hi ka tan hmun nuam leh ṭha ber a ni lo, inrintawkna ka neih san loh em avangin set hnihna tie break kan khelh lai pawh khan ka chak loh phah.

"Season dangah pawh clay-ah hian harsatna ka lo tawk tawh ṭhin. Roland Garros khelh turah pawh rinkai ka ni lo tih ka hria, amaherawhchu theihtawp ka chhuah dawn a, midang tan hmachhawn awlsam nih ka tum lo," a ti.