IPL boruak a nung tulh tulh

Indian Premier League-ah team tinin match 13 an khel tawh a, match khat ṭheuh chauh an khel tawh dawn. Match 13 khelh zawhah champion lai Chennai Super Kings leh Mumbai Indians chiahin playoff khelh beiseina an nei tawh lo a, club thar Gujarat Titans chiah playoff khel turin an tling.

Thawhlehni zan khan Sunrisers Hyderabad chuan Mumbai Indians chu run thumin an hneh a, playoff beiseina an chhi nung ve zel. Nizan khan Kolkata Knight Riders leh Lucknow Super Giants te an inkhel a, Lucknow hi an chak a nih chuan Titans hnung an zui ang. KKR an chak a nih erawh chuan result dang an nghah a ṭul ang.

Sunrisers tan Tripathi
Wankhede Stadium-ah Mumbai Indians-in vawm hmasak an thlang. Sunrisers tan opener Priyam Garg-a'n 42 runs a siam a, Rahul Tripathi (76) leh Nicholas (38) te chet ṭhat zarah 193/6 runs siamin dinhmun ṭhaah an awm.

Target sang tak chhawpsak mah se Mumbai opener Rohit Sharma (48) leh Ishan Kishan (43) te an che ṭha a, chak beiseina an nei hial. Over tawp berah Mumbai tan chak turin 19 runs siam a la ngai a, 15 runs tehmeuh vaw chhuak mah se 190/7 runs chauh an tlin tak avangin run thumin an chak lo.

Engtin zel?
Zanin hian Royal Challengers Bangalore chuan pakhatna dinhmun hauhtu Gujarat Titans an hmachhawn dawn a, hnehna chan ringawt hi a tawk lo. Bangalore tan NRR ti ṭha thei khawpa chak a nih loh pawhin Mumbai Indians-in an elpui Delhi Capitals an hneh a ṭul ang.

Mumbai captain Rohit Sharma chuan, "Match tawp berah player la khel lote khelhna hun kan pe ang," tiin a sawi a, Bangalore ṭantute tan chuan hriat a nuam lo ang. Chutihrualin Bangalore erawhin an tih tur an tih phawt a ṭul dawn a, Gujarat hneh chu an hna hmasa a ni.