Villa lakah Chelsea vannei

Chelsea chuan goal an phurh hmasak hnuah minute hnih chhungin goal hnih an khung. Pathianni zan Premier League inkhelah Chelsea chuan Aston Villa 2-1 in an hneh hram a, palinaah dinhmun an sawhnghet.

Villa Park-a inkhelah mikhual Blues lamin inkhel thunun viau mah se goal an an khung thei lo. Chawlhlawk hma hretin defender Kortney Hause-a'n Kepa ball dan ber chu hnai tak aṭangin a khung.

Second half-ah Chelsea tan substitute Christian Pulisic-a'n (60') si phurh a sut hnuah striker palian Olivier Giroud (62') chuan chakna goal a khung. Frank Lampard-a nauten ball chang tamin inkhel thunun zui mah se goal dang a lut tawh lo.

Chelsea tlarhma an hriam tawk lo a, khingpuite goal bul hnaiah ball an inpe fuh hleithei lo. Goal mamawh lai takin Pulisic a rawn inlar, United States international hian January 1 hnua a match hmasa berah hian captain Cesar Azpilicueta-a cross chu a pal goal.

Blues manager Lampard chuan, "Hliam vangin a inkhel thei lo rei a, tunah chuan a inpeih ta. Player pawimawh a ni chhunzawm dawn a, inkhel bul ṭantu zingah pawh a tel leh thuai ang, a chawlh rei avang khan goal khung châkin a tuihal hle," tiin Pulisic chungchang a sawi.

Team puma hmasawn an ngaihna sawi zuiin Lampard chuan, "Kan khel ṭha a, goal kan chhuah hnuah point hmu turin theihtawpa kan beih let a ngai, hei hi tun season kan hman dan tlangpui chu a ni. Tihsual nei hmasa loa chak dan kan zir a ngai," tiin a sawi.

English manager hian Tammy Abraham aiah Giroud chu inkhel bul a ṭantir. France international hian khel ṭha viau lo mah se chakna goal a khung, season tharah Timo Werner an neih belh dawn bawk avangin tlarhma lama hmun chan inchuh boruak hi a sang hle ang.

Chelsea ṭantute tana thu lawmawm chu khelmual chhunga N'Golo Kante chet dan kha a ni ang. 5 ft 6 in chauha sang midfielder hian Villa goal nawr tur tam zawk chu a chhu chat hmiah hmiah a, an hnuk pawimawh a ni.

Coronavirus hlauh vangin team training zawm tlai mah se match hmasa berah ṭha takin a khel nghal.

Lampard-a naute hian Ningani zanah champion lai Manchester City an mikhual zui dawn a; June 28, Pathianni zanah league lama an elpui Leicester City an lenchilh zui dawn bawk avangin hmabak an nei hautak hle.