Aizawl leh Bangalore a intiat

Khalid Jamil-a kaihhruai Aizawl FC-in a vawi khatna nan RG Stadium, Mualpuiah point thum an hlawh chhuak zo lo. Amaherawhchu AFC nena inhnehtawk hi champion lai Bengaluru FC an ni.

Nimin inkhelah Aizawl FC-in Brandon VL Remdika goal hmangin minute 40-naah hma an hruai a, Blues-in captain Sunil Chhetri goal ropui hmangin minute 45-naah an sut. Second half-ah Albino Gomes-a'n India captain Chhetri-a penalty pet a dang a, Aizawl FC keeper hi hero of the match-a thlan a ni.

Goal khat ve ve
Aizawl FC forward Bayi Kamo Stephane chu Blues defender Sandesh Jhingan leh midfielder Cameron Watson venna karah a tal chhuak. Ivo­rian forward hian Ashutosh Mehta tan through ball pein Mumbai FC player hlui hian lei hrulin ṭha zetin a cross a, Brandon-a'n chiang takin a khung.

AFC an fimkhur tawk lo a, Eugeneson Lyngdoh ball tauh per chu Watson-a'n tauh perin Sunil Chhetri zawnah a tla fuh. Goal theihna tur nia lang lo aṭangin Bengaluru captain hian box pawn aṭangin kawh pawtin goal kilah a pet lut.

Thutlukna mak
Referee Rowan Arumug­han-a'n second half minute sarihnaah Lalruatthara chu Sandesh Jhingan laka a chet dan vangin penalty chawi bakah yellow card pek a ni.

Entu mipuiin referee thutlukna an hre thiam lo. Chhetri a lo pen chhuak a, penalty pet chhe lo mah se keeper Albino-a'n a dan sak.

Darkar khatnaah Australian midfielder Watson corner pet chu Jhingan-a'n a tauh lut a, referee-in Bengaluru player-in keeper Albino an tibuaiah ngaiin a pawm sak lo. Replay aṭanga en nawn hnuah referee hian thutlukna dik a siamah a ngaih theih thung.

Tu nge vannei?
India captain Chhetri-a'n goal khung theihna turah ṭum hnih vel ngawt a hlah. Bengaluru FC-in ball an chang tam a, an goal nawr a na zawk. I League champion lai tan tlarhnungah Mizo tlangval Sena Ralte a khel ṭha viau bawk.

Amaherawhchu Aizawl FC pawhin point thum hmu tur khawpin goal chance ṭha an ngah. First half-a Syrian midfielder Mahmoud Al Amna ball tauhin cross bar a per. Mizo club-in second half-ah chiang takin Jayesh Rane, Ruatthara leh substitute R. Laldanmawia hmangin Blues tlarhnung an ṭhiat a, goal ngei tura rin chu Ivorian Kamo-a'n ho takin a hlah.

Coach lungawi lo
Bengaluru FC coach Albert Roca chuan, "Referee-in goal min pawm sak loh chhan kha ka hrethiam lo. Penalty thu­tluknaah erawh sawisel tur ka hre lo a, vawi thum vel penalty min pe turah ka ngai. Point thum hmuh kan phu a ni," tiin a sawi.

Spanish coach chuan goal khung theihna tur an hlah thu a sawi rualin Mizo tlangval Daniel Lalhlimpuia khelh danah a lungawi thu a sawi lang bawk.

Khalid Jamil chuan, "Ka player-te an thawkrim em em a, referee leh match commisioner te pawhin theihtawp an chhuah. Penalty -ah sawi zui tur ka nei lo a, ka player-te erawh ka khawngaih," tiin a ṭawngkamah a lungawi lo tih a hriat theih.

Mizo club hian Chennai City, Mohun Bagan, Churchill Brothers leh Bengaluru FC lakah penalty an chawi a, match hnuhnung pangaah vawi li penalty an chawi tihna a ni.

Mizo ṭan AFC
Aizawl FC-in ṭantu an nei ṭha a, Thawhṭannia East Bengal an mikhual hunah pawh Mizo mipuiin Mizo club hi an ṭawiawm ṭha leh ang.

Khalid Jamil-a hoten I League team zawng zawng hma­chhawn kimin vawi kua khelhah point 17 an hlawh chhuak a, pathumna an ni mek. Bengaluru erawh match khata khel tlemin point 12 hmuin panganaah an awm.