Laureus Awards 2017 Sportsman of the year-ah Usain Bolt

Infiammite chawimawina sang Laureus Awards chu Thawhlehni zan khan Monaco khawpuiah sem a ni a, Rio Olympic 2016-a gold medal pathum hlawh chhuaktu tlanchak hmingthang Usain Bolt chu Sportsman of the year chawimawina pek a ni.

Kum 30-a upa Bolt hian Rio Olympic 2016-ah khan 100m, 200m leh 4x100m relay-ah te gold a la a, Olympic a gold a hlawhchhuah tawh ringawt zat hi pakua a ni. Mahse, Bolt hi Beijing Olympic 2008-a gold an hlawhchhuahna 4x100m relay-a a team mate Nesta Carter-in damdawi hman phal loh a lo hman avangin a gold pakhat hi pe let tura tih a ni thung.

Rio Olympic 2016-a gold pali latu American gymnast Simone Biles chu Sportswoman of the year-ah thlan a ni a, Premier League champion Leicester City chu Spirit of sport award pek an ni. Leicester boss Claudio Ranieri leh captain Wes Morgan chuan chawimawina hi Foxes aiawhin an dawng a ni.

December-a Formula 1 cham­­pion a nih hnu lawka a chawlh thu puangtu Nico Rosberg chu Breakthrough of the year chawi­mawina pek a ni a, tlang panga bike intlansiak lama hming chher­tu Rachel Atherton chu Action sportsperson of the year award pek a ni a, Britain nula hi 2008, 2013, 2015 leh 2016 World Cham­pionship-ah te a champion tawh.

Chawimawina dang

• Team of the year: Kum 108 hnua Major League Baseball World Series chawitu Chicago Cubs hnenah pek a ni.

• Comeback of the year: Rio-a a olympic gold 23-na hlawh chhuaktu American tui hleuh chak Michael Phelps-a'n a dawng.

• Sportsperson of the Year with a disability: Paralympics 2016-a fencing (ngunhnam vai) gold latu Beatrice Vio hnenah pek a ni.

• Sport for Good Award (mi­dangte phurna petu) Rio Olympic a inlan Refugee Olympic Team hnenah an hlan.

• Best Sporting Moment: Junior Soccer World Challenge-ah Barcelona Under-12 team chuan an khingpui Japanese naupangte chak loh tuar thiam loa an ṭap chu an thlem a, Catalan club U12 team hnenah hian he chawimawina hi pek an ni.

• The Laureus Sport for Good Award: Waves for Change.