Europa League ; Pogba vs Pogba

Europe club-te tana inelna sang ber dawttu Europa League knockout round chu zanin hian first leg khelh a ni dawn a, February 23 zanah second leg khelh a ni leh ang. Round of 32-a inlan tur club-te chu group stage paltlang club 24 bakah Champions League group stage-a pathumna dinhmun hauh club pariat te an ni.

Manchester United-in zan­in dar 1:35 hian French club Saint-Etienne an mikhual dawn a, English club hi an group-ah hmahruaitu an ni pha lo a, Europa League-ah an la champion lo. Chutichung chuan Jose Mourinho hote hi sum an hman tam avangin chak tura rinkai an ni tho a, an inkhel turin ngaihven a hlawh chhan tak erawh khawvel player manto ber Paul Pogba-a'n a u Florentin Pobga a hmachhawn tur hi a ni.

Inkhelh thiam unau

August 19, 1990 khan Gui­nea khawpui Conakry-ah phir unau an piang a, an hming chu Florentin leh Mathias te an ni. Thla riat hnuah Guinean chhung­kua hi France khawpui Paris khaw dai fema veng Roissy-en-Brie-ah an pem a, hemi hmunah hian Paul Pogba chu March 15, 1993 khan a piang.

Kum 26-a upa Florentin chuan, "Kan chenna hmuna awm artificial pitch-ah chuan ṭhiante nen kan inkhel ṭhin a, helai hmun hi football kan inzir chhoh ṭanna a ni. Kan uanauin team khatah kan awm ho a, nuam tih vangin Paul hian goalkeeper hna a chelh chang pawh a awm. A tak takah erawh goal khung nuam kan ti vek a, tv aṭanga kan hmuh player lar tak takte tih dan chu kan entawn ṭhin," tiin an naupan lai nun a sawi.

Saint-Étienne defender Florentin chuan, "Kum 2007 khan ka phirpui pa Mathias nen Spain-ah Celta Vigo zawm turin kan kal a, Paul erawhin Le Havre a zawm thung. Tuna kan dinhmun thleng tur hian inṭhen kha a ṭul a, kan pathumin professional footballer vek kan ni tawh a, inchhirna kan nei lo. Awmna hmun sawnin inhlat mah ila, nitinin kan inbe pawp reng a ni," tiin an football career inṭan dan a sawi.

Florentin hian Celta aṭang­in Spanish club CS Sedan-Ardennes chu kum 2009 khan a zawm a, hetih hunlai hian Sedan hi second division club (second-tier) an ni. Reserve team tana a khelh ṭhat avangin March 2010 khan Florentin hian professional contract hmasa ber a ziak.

June 2013-ah Florentin hian Saint-Etienne hi a zawm a, kum thum leh a chanve hnuah French club tan hian vawi 87 a khel tawh. Feet ruk leh inches 2.5-a sang defender hi 86 kg zeta rit a ni a, defence lai khel turin ṭha mah se a goal bawh a nat avangin left back-ah hman ṭhin a ni bawk. Florentin hian Saint-Etienne-ah hmun pawimawh a chang a, United hmachhawn turin inkhel bul a ṭan ang.

Florentin leh a phirpui Ma­thias te hi an pianna ram Guinea tan an khel a, Saint-Etienne defender hi ram tan vawi 12 a inlan tawh. A phirpui Mathias hi forward niin Dutch club Sparta Rotterdam tan a khel a, ram tan vawi hnih a inlan tawh bawk.

Old Trafford-ah Pogba

Manchester United-in Paul Pogba a hriatna a rei tawh a, zaninah Pogba dang an hmu leh ang. Florentin chuan, "Draw neih lai khan Paul nen hian kan inbia a, kan intum tur thu ka sawi lawk a, ka sawi dik. Ka chhungte ṭan lam tur ka sawi thei lo a, amaherawhchu kan inhmachhawn vawi khatna tur a nih avangin kan vai atan hun pawimawh tak a ni," tiin Old Trafford a inkhelh a châk tawh thu a sawi.

United hmelma Arsenal ṭantu Florentin chuan, "Zlatan Ibrahimovic emaw player dang emaw ka chang thei a, ka unaupa ka veng thei bawk. Paul hi ka hrechiang a, ka veng a nih chuan player dang ka ven ang thoin ka veng ang," tiin a inhrosa nasa hle.

Saint-Etienne hian group stage-ah hneh loh an tawng lo a, vawi thum chakin vawi thum an inhnehtawk. Ligue 1-ah Florentin-a khelhna club hi pangana ni mek mah se goal venhim kawngah chuan Paris Saint-Germain chiah an tluk lo. Saint-Etienne hian league-ah goal 19 chiah an chhuah.

United lam

Jose Mourinho hote hi Eu­ropa League group stage-a goal khung tam ber an ni a, goal 13 zet an khung. United goal khung khawl Zlatan Ibrahimovic-a'n PSG tana a khelh laiin Saint-Etienne hi vawi 13 a hmachhawn a, goal 14 a khung.

United hian French vawi 26 an hmachhawn tawhah vawi 13 an chak a, vawi hnih chiah an chak lo. United hian January transfer-ah Morgan Schneiderlin leh Memphis Depay te an chan a, Bastian Schwein­steiger chu Europa League khel thei turin an ziak lut. Portuguese manager Mourinho hian German midfielder Basti erawh a chhawr kher a rinawm loh.

Mourinho chuan, "French club an nia, theihna an nei a ni," tiin an khingpui tur laka fimkhur a ṭul thu a sawi. Saint-Etienne hian tun hnaiah chhuan tur nei lo mah se France legend Michel Platini-a'n Juventus a zawm hmaa a khelhna club a ni a, Ligue 1-ah pawh vawi 10 zet champion tawh an ni.

Intawn tawhna

United leh Saint-Etienne te hi 1977-78 European Cup Winners' Cup first round-ah an inhmachhawn a, France ramah 1-1 in an inhnehtawk. Khualmualah United fan an chet mawi loh avangin Old Trafford-ah khelh phalsak an ni lo a, Plymouth khelmuala Home Park-ah Saint-Etienne hi an mikhual a, Stuart Pearson leh Steve Coppell te goal hmangin aggregate-ah 3-1 in an chak.