Nadal leh Federer dahsangtu Becker

Wimbledon champion thei naupang ber Boris Becker chuan Roger Federer leh Rafael Nadal te chuan nomawi tam zawk an la chawi theih a beisei thu a sawi chhuak.

Kum 17 a nih laia Wim­bledon nomawi chawi thei Becker chuan, "Australian Open khelh ṭan a nih hma khan mi tam takin Roger leh Rafael te hian eng chen nge an thlen theih tih kha an ngaihtuah dan a ni a, final khelh zawh a nih meuh chuan nomawi dang engzat nge an chawi belh theih ang tih a ni leh tawh zawk," a ti.

Kumin Grand Slam hmasa ber Australian Open-ah khan world number 1 Andy Murray leh world number 2 Novak Djokovic ten beisei an phak lo a, kum 35-a upa Federer chuan Nadal hnehin a vawi 18 nan major title a la.

Grand Slam vawi ruk champion tawh Becker chuan, "Thla tam vak lo liam ta kha chuan Rafael leh Novak te hian Federer nomawi chawi zat an chawi theih mai ka ring ṭhin a, tunah erawh ka ngaihdan ka thlak leh tawh. Federer hian tennis khel tura thiamna neih ngai zawng zawng a neih vek avangin nomawi dang a la chawi leh ka ring, chutiang bawkin Nadal pawh a la champion leh ang," tiin a sawi.

Kum 49-a upa Becker kaihhruaina hnuaiah Djokovic khan Grand Slam nomawi paruk zet a chawi a, nikum De­cember thla khan Serbian thiampuipa nen hian an inṭhen a, Becker hian coa­ching-ah a lo kir leh ngei dawn thu a sawi bawk.