Barcelona zin kawng a tawp?

Paris St-Germain lakah Bar­celona chuan Champions League chanchina an chak loh chian ber ṭum an tawng. Thawh­lehni zan khan Catalan club hi Parc des Princes-ah 4-0 in an tlawm.

Last 16 first leg inkhelah Angel di Maria chu Barcelona mual­phona bul ṭantu a ni a, Argentina international hian box pawn aṭangin goal hnih a khung a, January thlaa an lakluh Julian Draxler-a'n goal khat a khung a. Goal hnuhnung ber khungtu Edinson Cavani chuan Barcelona defender Gerard Pique a dah mualpho chiang viau bawk.

Champions League knock out round-ah khualmuala goal li chin phur tawh zingah hnehna chang let thei an la awm ngai lo. Barcelona hian kum 2007 hnua quarterfinal an luh loh hmasak ber ṭum an tawng duh lo a nih chuan March 8 a second leg an khelh hunah thawnthu thar an ziah a ṭul dawn.

Barcelona captain Andres Iniesta chuan, "Kawng eng­kimah kan chhiat ni kan tawng a ni. Second leg-ah chuan thil a harsa tawh dawn a, chu tih rualin kan theihna zawng zawngin kan bei let ang," tiin bei­seina a la tawp loh thu a sawi.

Rinkai PSG

Manchester United defender hlui Rio Ferdinand chuan, "Ka ngaihdan chuan PSG hi team hlauhawm an ni. Team ṭha berte zinga mi an hneh theih avangin inrintawkna an neih belh dawn a, champion turin theihna an nei tih a chiang," tiin French champion chu nomawi chawi thei an nih thu a sawi.

PSG hian kum 2013 aṭanga khan French football an thunun hneh hle a, a zawnin season li chhung league nomawi an chawi tawh a. Europe-ah pawh team ṭha pawl an ni pha a, season hnuhnung pali chhung a zawnin quarterfinal an lut tawh bawk.

Unai Emery kaihhruaina hnuaiah league lamah beisei phak rih lo mah se Champions League boruak erawh a dang ta! Season thum chhung Europa League champion ni thei Sevilla manager hlui hian tun hmain Barcelona hi vawi 23 a hmachhawn tawhah vawi khat chiah hnehna a chang ve a, PSG nen erawh boruak a dang ta.

France champion hian tun season inelna hrang hrang match 32 a khelh aṭanga goal 34 khung thei Cavani an nei a, Manchester United leh Wolfsburg a beisei phak lo Di Maria leh Draxler te chuan Paris-ah an theihna tak tak an pholan leh tak avangin tun ṭumah hian kum danga an la dai ngai loh an dai a nih pawhin a mak lo ang.

Paris i nunrawng lua e...

Lionel Messi, Luis Suarez leh Neymar te tlarhmaah an intlar chungin Barcelona hian PSG goal zawnah vawi khat chiah an pet thei! PSG erawhin vawi 16 an pet zinga ṭum 10 zet chu Barca goal zawnah a kal thung.

Vawi nga champion tawh Barcelona hian group stage match ruk an khelhah vawi nga hnehna an chang thei a, an chet sual awm chhun hi Manchester City 3-1 a an hneh loh chauh a ni - he mi ṭum hian Messi-a'n goal a khung tho. PSG lakah erawh tun season Champions League top scorer Messi (10 goals) chu goal hmaah a hlauhawm lo tluan chhuak zak.

Barcelona hi champion tura rinkai ni mah se an hna a hautak tawh dawn a, chutih rualin an kawng hi phui vek erawh a la ni bik lo. Luis Enrique naute hi Nou Camp-ah chuan khingpui ṭihbaiawm ber an ni, tun hnai inelna hrang hranga an mikhual hnuhunung pasarih zinga paruk lakah chuan goal thum aia tam an khung ziah.

Barca-in Champions Lea­gue bika an mikhual hnu­hnung ber chu Borussia Mon­chenglad­bach an ni a, nikum December thla khan Bundesliga club hi 4-0 in an sawp. PSG tan goal li an neih avangin ngaih ṭha taka awm ngawt theih a la ni lo ang.

Enrique thukhawchang

Barcelona manager Enrique chuan, "Kan khingpuite khan ball an chan lai leh chan loh lai pawhin an thawkrimin an huaisen em em a, khelmuala thil thleng tichiangtu chu kan result hi a ni. Goal hnih an rawn khung hnu khan nih rual leh kan tum a, goal dang kan chhuah leh tak avangin a harsa zo ta a ni," tiin a sawi.

Spanish manager chuan sawi chhunzawmin, "Lung­ngaia indawm kun hun a ni lo a, infiamna nuam leh hlim­awm hmachhawn zui tura inbuat­saih a ṭul. Kan chak loh hi ka mawhphurhna a ni a, ka naute chu nidanga hnehna chang chunga hlimna min thlentute tho kha an ni," tiin a naute a sawisel duh lo.

Kum 46-a upa Enrique hian 2014 aṭang khan Barcelona hi enkawlin nomawi pariat a chawi pui tawh a, tun season-ah erawh beisei an phak lo. Copa del Rey-ah final an lut tawh a, mah se La Liga nomawi an kawl lai chu Real Madrid laka chan thei dinhmunah an ding mek.

PSG an lawm

Goal hnuhnung ber khungtu Cavani chuan, "Paris-ah hian kum li chhung hun ka hmang tawh a, inkhel hautak leh ropui tak tak pawh ka lo hmachhawn tawh ṭhin. Chuti chung chuan vawiin ang em em a hlim leh nuam tih hi ka la nei ngai lo," tiin Barca chiang taka hneh nuam a tih thu a sawi.

PSG manager Emery chuan, "Hnehna kan chan avang hian kan tlang tihna a la ni lo, minute 90 dang kan khelh leh hunah vawiina kan khelh ang hian kan khelh chhuah leh ka duh ang. Team kan ni a, kan chak loh chuan kan zavaiin kan chak lo a, kan chak a nih pawhin kan vaia tan a ni - football chu mimal ni loin thawhhona ṭha a ni tur a ni," tiin inpumkhatna a ngaihpawimawh thu a sawi.