Manipur Poll: BJP tan Modi a campaign dawn

Prime Minister Narendra Modi chuan February 25 khian Mani­pur a tlawh dawn a, assem­bly election neih turah Bharatiya Janata Party (BJP) tan a campaign dawn a ni.

BJP Manipur in-charge Prahlad Singh Patel chuan Modi-a'n Manipur a tlawh tur thu hi Nilaini khan official-in a puang a, Imphal-a Kangla Fort-ah thu a sawi ang. Patel chuan BJP election campaign video chu an tlangzarh tawh thu sawiin, kawng hrang hrangin campaign beihpui an thlak mek tih a sawi. Tunhnaia rights activist Irom Sharmila-i'n BJP-in an party ticket-a ding tura an thlem thu leh, cheng vaibelchhe 36 pek an tiam nia a sawi chungchang chhang letin, party intihhmingchhiat tumna a ni, a ti.

Hmeichhe candidate pali an awm

March 4 leh 8-a Manipur assembly election neih turah hian hmeichhe pali chiah chuh tum an awm. Hmeichhe candidate zingah hian rights activist Irom Sharmila chu hming langsar a ni a, a ni bakah hian Congress sorkara Social Welfare Minister nilai AK Mirabai Devi chu a langsar hle bawk. Minister Devi-i hian Patsoi bialah a chuh dawn a, BJP chuan Nemcha Kipgen-i chu Kangpokpi bialah an thehchhuak ang. Manipur National Demo­cratic Front (NDF) candidate Yumnam Romola Devi-i chuan Keishamthong bilah a chuh dawn a, LJP MLA Karam Shyam-i chuan Independent-in Lang­thabal bilah a chuh dawn bawk.

Manipur-ah hian constituency tinah vote nei mi 30,000 chuang an awm vek a, hetiang hi state dangah a awm zen zen lo nia sawi a ni. Inthlan thlan thawh khatna hi March 4-ah neih a ni dawn a, constituency 38-ah neih a ni ang. Imphal East, Imphal West, Bishnupur, Churachandpur leh Sadar Hills district-te a huam dawn a ni.

Candidate 215-te'n hming pelut

Tunkar Thawhlehni khan inthlan neih tura chuh tumte hming pek luh theih hun chu a tawp a, candidate 215 an awm. Chief Electoral Officer (CEO) Vivek Kumar Dewangan chuan, hming pek luh theih tawp niah candidate 83-te chuan hming an pe lut tih sawiin, hengte hi nimin khan endik a ni a, February 18 thleng inhnuhdawh theih hun hawn a ni ang, a ti. March 8-a inthlan thawh hnihna neih turah candidate 28-te chuan Thawhlehni vek khan hming an pe lut tih Dewangan chuan a sawi bawk.

Tharum thawhna a thleng

Inthlan chuh tumte tana hming pek luh theih hun tawp ni Thawhlehni khan Thou­bal district-a Khangabok consti­tuency-ah Congress pary mi leh sa leh, BJP thlawptute inkarah buaina a chhuak a, tharum thawhna thlengah mi 9-in hliam an tuar. BJP worker-te leh Cong­ress party mi leh sate inkara buaina chhuak hi chawhma dar 11 vela inṭan a ni a, Chief Minister Okram Ibobi Singh-a fapa Okram Surjakumar Singh-a chenna bul hnaia thleng a ni.

BJP candidate Thokchom Jadumani Singh-a thlawptute chuan kawng an zawh a, heta ṭanga inṭan hi nia tarlan a ni. Hei bakah hian Congress candidate Th Shyamkumar-a thlawptute chuan Andro constituency hmun ṭhenkhatah kawngpui an dang a, BJP candidate Dr Nimaichand Luwang-a campaign chu dan an lo tum nia sawi a ni. Buaina chhuahna hmun hi police-te chuan an pan nghal a, mipui hnawhdarh nan tear gas leh mock bomb-te hman a ni. Hliam tuarte hi Thoubal District Hospital-ha dahluh an ni. Fimkhur thilah Angtha khua leh a chheh velah te venhimna khauhzawka kalpui nghal a ni.

BJP Manipur in-charge Prahlad Singh Patel chu hemi chungchangah hian Governor Dr Najma Heptulla lakah a zualko a, dan leh thupek khauh zawka kengkawh turin a ngen. Dr Najma chuan Chief Minister Ibobi Singh-a hnenah a cabinet minister leh MLA-te chu BJP worker-te tana harsatna thlen zawnga che tawh lo turin a ngen a ni. Campaign chawkbuai thei zawnga chet chu dankalh a nih thu a sawi bawk.