Zahna kawnah Arsenal

German champion Bayern Munich-in Allianz Arena-ah Arsenal 5-1 zetin an sawp. Goal nga chhuah Lon­don club an mualpho a, goal tam zawk an phur loh avangin Arsene Wenger hote hi an vannei a tih theih.

Ningani zan Champions League last 16 inkhelah Bayern Munich tan Arjen Robben-a'n goal hmahruai khungin Arsenal-in Alexis Sanchez hmangin sut mah se, second half ṭan tirhah Gunners defender Laurent Koscielny a inhliam a, Carlo Ancelotti hoten goal li dang an khung belh.

Bayern tan Thiago Alcantara chuan goal hnih a khung bakah Robert Lewandowski leh substitute Thomas Muller ten goal khat ve ve an thun belh.

German champion hian March 7, Thawhlehni zan khian second leg khel turin Emirates Stadium an tlawh leh dawn a, Gunners ṭantute tan phur taka nghah a har tawh ang.

Mualpho-vannei
Arsenal hi group hmahruaitu an ni a, Bayern hi pahnihna niin inelna tehfung aṭang chuan London club hi rinkai zawk an ni. Amaherawhchu club history leh player neih dan hmangin club pahnih an khaihin a, an inhmachhawn hma hauhin Arsene Wenger pawh a ṭawng dawih nghal hle.

Allianz Arena-ah Gunners an inkiltawih nghal a, Bayern player ball inpe kual an thlir a, an chan chhunah tihfuh nei thei thei loin tihsual an ngah hle.

Minute 11-na lekah Robben-a'n a ke vei lamin goal chung kilah a pet lut a, Dutch winger-in goal a khung theih nan Bayern player pakua zet an inrawlh. Goal khat luh hnuah Gunners chu goal tam zawk chhuah theiah an ding zui bawk.

Amaherawhchu darkar chanve hnuah Bayern forward Le­wan­dowski-a'n penalty a chawi a, referee thutlukna hi inhnial theihna tak a ni. Arsenal tana Sanchez pet chu keeper Manuel Neuer-a'n dang mah se Chilean forward hian goal-ah a chantir leh tho.

Sanchez-a'n Arsenal tan bei­seina siam hman mah se second half-ah Gunners defender ṭha ber Koscielny a inhliam avang leh German ral a len avangin beisei boah a chang zui.

Minute 53-naah Philipp Lahm-a crossball duhthusam chu Lewandowski-a'n ṭha taka a tauh avangin keeper David Ospina tan dan theih a ni lo.

Minute thum hnuah Thiago Alcantara-a'n Polish forward Lewandowski khen per chu goal-ah khungin, box pawn aṭanga Barcelona midfielder hlui pet chuan Granit Xhaka boot khawih perin minute 63-naah a pet goal leh nghal bawk.

Colombian keeper Ospina-a'n Arsenal vawi tam chhan mah se kawng engkima Bayern an phak loh avangin tih theih a nei tlem hle. Gunners khelh fuh loh nemngheh nan Alex Oxlade-Chamberlain-a'n chiang takin ball a hloh a, substitute Muller-a'n awlsam takin goal ngana a khung.

Bayern hian November 4, 2015 khan Arsenal hi 5-1 in an sawp tawh a, tun ṭum hi Germany-a London club an mualpho vawi hnihna a ni. Ningani zanah Arsenal-in penalty sawi hlawh hmangin goal an khung a, mualpho viau mah se goal tam zawk chhuah thei dinhmuna an din avangin an mualphona hi belhchhah theih a ni a, thlirna dang aṭang chuan an vanneihah a ngaih theih ang.

Eng nge an sawi?
Bayern Munich boss Carlo Ancelotti chuan, "Kan khel ṭha takzet a, amaherawhchu final a la ni lo," tiin Champions League nomawi chawi tawh coach hi a ṭawng fimkhur hle.

Wenger chuan, "First half tawp hmain hmahruai theihna tur vawi hnih kan hlah a, goal kan chhuah hnuah kan chhang let bawk. Second half-ah Koscielny kan chân hma lutuk a, kan tlu sawp zui bawk. Goal thumna luh hnu kha chuan chhang lêt tur kan awm tawh lo a, kan tluk lo hrim hrim bawk. Thil thlen dan hi sawifiah a harsa a ni," tiin inkhelh banah a sawi.

Arsenal-in season hnuhnung parukah Champions League last 16 an paltlang thei lo a, tun hi vawi sarihna tur a nih ngei a rinawm.

Gunners hian February 20, Thawhṭanni zanah National League club Sutton United nen FA Cup fifth round-ah an inhmachhawn dawn. Premier League-ah Chelsea an thlauh tawh bawk avangin FA Cup hi nomawi an beiseina neih chhun niin a lang tawh.