Mayweather vs McGregor: A la chiang lo

Tun hnaiah boxer ropui Floyd Mayweather leh UFC champion Conor McGregor-te chuan in­hnek turin thutlukna an siam niin khawthlang media te chuan tarlang mah se Mayweather chuan thuthang dik lo mai a nih thu a sawi.

Vawi 49 inhnek a hma­chhawna hnehna chang vek thei boxer chuan twitter-ah he thu hi tarlangin, "Keimah leh midang inkarah inhnek turin inremna siam engmah a awm lo a, chutianga thurem a awm a nih phawt chuan khawvel hriata puangzar hmasa ber chu keimah ka ni ang," tiin a fan-te a hrilh.

Irish fighter McGregor chuan twitter lama Mayweather thuchhuak hi a tihel nghal a, Lal ṭhuthlenga a ṭhu lai thlalak tarlangin, "Las Vegas-ah ka awm mek a, he hmun ka thleng tih a hriat rualin Floyd chu a chawl nghal der mai a ni," a ti.

Mayweather chuan McGregor hi chhangletin, "Conor McGregor min hmachhawn i duh takzet a nih chuan UFC nen inremna siam thuai ula, i aiawhten ka naute lo be thuai rawh se," tiin Irish fighter chu inhnek a duh takzet a nih chuan hma la turin a hrilh.

September 2015 a WBC leh WBA welterweight title a kawl lai Andre Berto laka a humhim hnua inhnek chawlhsan tawh Mayweather hian kum 2008 khan mi 39 a hnek hnuah boxing a lo chawlhsan tawh bawk a, mah se lo kir lehin vawi 49 inhnek a tlawm hmel hmu lo Rocky Marciano record a nihrual hnuah a chawl leh a, McGregor hnek tur hian a lo kir leh a nih pawhin a mak lo ang.

American boxer hian January khan McGregor chu a inhnekpui a nih chuan pound maktaduai 12 a hlawhtir tur thu a hrilh niin ESPN hnenah a sawi a, professional boxing a la inlan ngai lo McGregor hian pound maktaduai 80 a phut thung.

Kum 28-a upa McGregor hian California State Athletic Commission hnuaiah boxing licence neiin USA-ah a duh chuan inhnek phalna a nei tihna a ni a, December 2016 khan Mayweather hi mixed martial arts dan hnuaiah inhnek puiah a lo cho tawh. Mahse, UFC dual-division champion hmasa ber McGregor hi UFC a contract nei a nih miau avangin Mayweather a hmachhawn dawn a nih chuan UFC phalna neih a ngai a, UFC president Dana White chuan boxer pahnih chu pound maktaduai 20 ve ve pek a remtih thu lo sawi tawh mah se inremna engmah neih a la nih loh thu a sawi.

Mayweather hian nikum February thla khan boxing ring chhung lut leh turin tluklehdingawn tel sum nena thlem a nih thu a lo sawi tawh a, "Ka lokir leh dawn a nih chuan sum vang a ni lo ang. Mahse, hlawh ka neih ve te chu a ngai a, chu chu Floyd 'Money' Mayweather ka nih chhan a ni reng a ni," a ti.

Manchester United striker Zlatan Ibrahimovic chuan boxer pahnih incho tawn reng hi a ning deuh a ni ang, martial arts lama black belt footballer hian boxer pahnih chu amah hnek tura sawmin, "Min hmachhawn a nih erawh chuan hospital lamah in luh nghal a ṭul ang," tiin a cho hle!