I League nomawi inchuh boruak a sang ; Mohun Bagan an tawlh thlu
Nilaini zan khan Mohun Bagan-in Cooperage Ground, Mumbai-ah goal an khung thei lo, Mariners hi table hnuai lama awm Mumbai FC nen an inhnehtawk.
Kolkata Derby zawhah East Bengal-in Shillong Lajong lakah point khat chiah an hlawh chhuak ve bawk a; Mizo club Aizawl FC-in Kolkata club lian pahnih hi an hlat lo - I League champion tur a la chiang lo.
February 20, Thawhṭanni hian Aizawl FC-in RG Stadium, Mualpuiah East Bengal an mikhual dawn a, Mizo club au chak tura khelmual pan an ṭhahnem ngei ang. Khalid Jamil-a hnuaiah AFC-in result ṭha an neih avangin Mizoten I League nawmna an tem chho mek.
Mariners an vannei
Mumbai FC-in foreigner nei loin season an ṭan a, match hmasa pahnih chak mah se a zawnin vawi ruk an chak lo. Mariners tan Santosh Kashyap hote hi point thum hmuh theihna tura ngaih an ni.
Amaherawhchu Mohun Bagan hmachhawn turin Kashyap-a'n foreigner pali Trinidadian midfielder Densill Theobald leh Afghan defender Djelaludin Sharityar bakah Brazilian duo Alex Willian leh Anderson da Silva te chu a vawi khat nan a rualin bul a ṭantir vek a, team dang daih an ni.
First half-ah Thoi Singh-a'n kawh pawtin a pet goal a, referee-in offside position-a awm Anderson-a'n a khawih fuhah ngaiin Mumbai FC goal khung hi a pawm sak lo. Mizo tlangval Jeje Lalpekhlua chu hahdamtir a nih avangin bench-ah inkhel bul a ṭan. Sony Norde leh Darryl Duffy ten goal an khung theih loh avangin Hnahthial tlangval hi minute 20 la awmin tlan lut mah se result danglamna a ni pha lo.
Kashyap a lawm lo
Mumbai FC coach Santosh Kashyap chuan, "First half-ah khan goal khung thei tur kan ni a, kan khelh dan pawh a lungawi thlak hle. Hetianga kan khelh zel chuan result ṭha zawk chu kan nei thuai ang," tiin a sawi a, referee vanga an result neih tur ang an neih loh ṭhin thu a sawi tel bawk.
Nikuma relegation battle aṭanga Salgaocar chhanhimtu coach Kashyap chuan, "Relegation lam kan buaipui lo. Kan tum chu a sang pathuma tel phak a ni," tiin point sarih chauh la hmu mah se a ṭawng pawr hle.
Jeje thukhawchang
Mohun Bagan striker Jeje Lalpekhlua chuan, "Kan vannei zawkin ka hria, chutihrualin kan result en chuan lungngaihna tur a awm lo. Tun season-ah vawi nga kan chak tawh a, vawi thum kan inhnehtawk a, chak loh kan la nei lo," tiin Vanglaini palai a hrilh.
Jeje chuan, "Mumbai lakah point hnih kan hloh a, tunah chuan champion kan tum a nih chuan draw pawh a thiang tawh lo. Result ṭha zawk kan neih theih nan theihtawp kan chhuah a ṭul a, goal khung lamah pawh nasa zawka ṭan lak ka mamawh a ni," a ti.
Engtin zel?
Tun season I League phase 1-ah match khat chiah khelh a ni tawh lo a, Mohun Bagan leh Bengaluru FC inkhel tur chu AFC hnuaia inelna an hmachhawn avangin April 1-ah sawn a ni.
East Bengal-in vawi kua an khelh tawh aṭangin point 21 an hmu a, match khata khel tlem Mohun Bagan-in point thum chauhin an pha lo.
Kolkata club lian baka nomawi chawi thei tur zinga chhiar tel Bengaluru FC chu champion lai ni mah se point 12 chiah an la hmu. Point hmuh dan aṭanga thlir chuan point 17 hmu tawh Aizawl FC chu champion thei zinga chhiar tel ngei tur an ni.
Aizawl FC hi season ṭan hma kha chuan an squad chhah tawk loh avangin Kolkata club elpha tura ngaih an ni lo a; amaherawhchu bul an ṭah fuh a, Thawhṭannia AFC-in Red and Gold hi an hneh thei a nih phawt chuan Mizo club lakah mi nawlpui ngaihdan thlakin a awm ang.
Team Dinhmun
# Team Pld W D L GF GA GD Pts
1 East Bengal 9 6 3 0 18 4 14 21
2 Mohun Bagan 8 5 3 0 12 3 9 18
3 Aizawl FC 9 5 2 2 12 9 3 17
4 Shillong Lajong 9 4 1 4 11 12 -1 13
5 Bengaluru FC 8 3 3 2 14 8 6 12
6 DSK Shivajians 9 2 4 3 8 8 0 10
7 Chennai City 9 2 2 5 6 13 -7 8
8 Mumbai FC 9 2 1 6 6 14 -8 7
9 Minerva Punjab 9 1 4 4 4 14 -10 7
10 Churchill Brothers 9 1 3 5 6 12 -6 6