Napoli lakah Real Madrid an lian

Real Madrid chuan Napoli lakah second half minute nga chhungin goal hnih an khung thei! Nilaini zan Champions League last 16 first leg inkhelah Spanish club hian Italian club lakah 3-1 a hnehna changin quarterfinal thleng turin an dinhmun an siamṭha tawh hle.

Santiago Bernabeu-a in­khel­ah Napoli tana goal khung hnem pahnihna Marek Hamsik chuan minute riatna lekah Lo­renzo Insigne tan through ball duhthusam a pe a, awmna hmun tur thlang fuh lo Real Madrid keeper Keylor Navas tana dan theih lohin Italy forward Insigne-a'n goal class sang a khung.

Insigne goal hmahruai khung hi tun season Champions League-a goal ṭha bik te zinga mi chu a ni phawt. Hamsik-a'n half way line hnung lam

aṭangin through ball ṭha bik chu a pe ngei a, Italy international Insigne khan insiam rem chawp miah loin yard 35-a hla aṭangin a pet nghal a, Real tlarhnung leh keeper a ti mualpho chiang hle.

Zinedine Zidane-a naute goal an phurh aṭanga minute 10 hnuah Karim Benzema hmangin an siphurh an sut a, France international Benzema hian Dani Carvajal cross chu Liverpool keeper hlui Pepe Reina dan hman lohin a tauh lut.

Second half-ah Cristiano Ronaldo-a'n ṭha zeta ball a tlan luhpui hnuah Toni Kroos a siamsak a, Germany international midfielder hian cool zetin an hmahruaina a khung, Napoli insiamrem hmain Casemiro chuan an chak nemngheh nan mawi zetin a hlap goal.

Ronaldo a reh

Kum 32-a upa Ronaldo-a'n Champions League bikah minute 523 chhung goal a khung ta lo. Real Madrid tana a khelh hnuah he inelna bikah goal khung loa a awm rei ber ṭum a la ni.

Portugal captain hian 2-1 a hma an hruai laiin yard 12 a hla lek aṭangin a goal khung theihna hun ṭha a hlah a, mahni hmasial tia sawisel hlawh fo Ronaldo hian hun ṭha a khawlrual hnu lawkah Benzema tan ball ṭha bik a siamsak a, Kroos goal khung theih chhan pawh a thawhrah liau liau a ni bawk.

Real Madrid tana Cham­pions League knock out stage match 38 a khelh aṭanga goal 34 khung thei Ronaldo hian tun season-ah a ṭhiante goal khung tur vawi nga a siamsak tawh a, Spanish club tana season khat chhunga assist a neih hnem ber ṭum a la ni.

Ronaldo hian tun season-ah beisei phak rih lo mah se Champions League chanchina goal khung hnem ber (95 goals) a la ni tho a, Lionel Messi (93), Raul (71) leh Ruud van Nistelrooy (56) te a hnungah an awm.

Napoli an zam lo

Napoli hian Champions League last 16 an khelh tawh ṭum hnihah quarterfinal an thleng zo lo ve ve a, kuminah hian ṭum danga an la tih theih ngai loh ti tur chuan an hna a hautak tawh dawn. Napoli manager Maurizio Sarri a zam lo, "Stadio San Paolo chu hremhmun ang mai a ni ang," tiin second leg a an mikhual tur lakah ṭhat chhuah an tum lo hle.

Kum 58-a upa Sarri chuan, "Second leg-ah lehthal ngei kan tum ang, tihsual kan neih loh a ngai dawn a, chu bakah na zawka goal kan nawr a ṭul dawn. Ka naute hnenah lung­ngai lo turin ka hrilh tawh a, tun ṭum aia ṭha zawk hian kan khelh chhuah a ngai ang," tiin a la tlawm lo hle.

Italian manager chuan sawi chhunzawmin, "Khawvela team ṭha bert zinga mi Real Madrid lakah kan chak lo a, a chhan chu tihsual kan ngah vang chauh a ni. San Paolo-ah chuan 2-0 a hneh let kan tum dawn a, kan khelmualah inkhel ṭan aṭanga minute 10 chhunga danglamna kan siam thei a nih chuan fan-te chu mikhual tana ṭihbaiawm khawp an ni ang," tiin a hneh loh Real hneh let theih a la inbeisei hle.

Zidane thukhawchang

Real Madrid manager Zi­dane chuan, "Benzema hian sawiselna karah pawh a theihna san zia a lantir leh ta a, player ṭha bik hi chu mamawh hunah an rawn lang leh mai ṭhin," tiin an siphurh suttu a fak.

Zidane chuan inkhelh a la tawp loh thu sawi zuiin, "Tunah hian quarterfinal kan la lut lo. Napoli khelmualah kan la kal dawn a, tun season-ah chuan mikhual tana khelh harsatna ber hmun pakhat a ni, kan tlang duh a nih chuan huaisen taka kan hma­chhawn a ngai ang," tiin a sawi.