A lu meh dan vangin Gyan a buai

Sunderland striker hlui Asamoah Gyan chu United Arab Emirates Football Association (UAEFA)-in an dan hnuaia players 46 lu meh dan dik tawk lo a puan zingah a tel! Kum 31-a upa striker hi Arabian Gulf League club Al Ahli-ah Chinese Super League club Shanghai SIPG aṭangin loan-in a khel mek.

Muslim dan hnuaiah 'sam ṭhenkhat' lai chauh meh hi phal loh a ni a, Muslim ram UAE lam football thuneitute chuan player-te chu lu meh dan phung pangngai nei turin an ti a, naupangten entawn tur ṭha lo an neih an hlau. UAE ram ṭhenawm zingah pawh sam vanga buaina hi a lo thleng zeuh zeuh tawh a, kum 2012 khan Saudi Arabia goalkeeper Waleed Abdullah chu an club Al Shabab tan a inlan hmain referee chuan a lu met ṭha phawt turin a lo ti tawh!

UAEFA chuan heng players an tar chhuah 46-te hi an club khelhna ṭheuh hnenah warning an thawn tawh a, hun pek chhunga an lu meh dan an thlak lo a nih chuan inkhel thei lo tur leh sum chawi tura hrem theih an ni ang.