Mupui chu a FU ta ; Europa League-ah Eintracht Frankfurt an champion

Eintracht Frankfurt-in Europa League final-ah Rangers an hneh a, kum 42 hnuah European trophy an chawi. Final hmuhnawm bikah Frankfurt leh Gers te hi hun pangngaiah 1-1 in an inhnehtawk a, penalty shootout-ah German club hi 5-4 in an chak.

Eintracht Frankfurt hi an logo-ah mupui lem a chuang a, an hming lem pawh mupui (Eagles - Die Adler) tih a ni. An champion chiah hian Bundesliga chuan, "Mupui chu a fu ta. Mipa puitling tana pen zimte hi Eintracht Frankfurt tan chuan thui taka zuan ang a ni. Kan lawmpui a che u," tiin chhuang takin lawmpui thu an ziak.

Final hmuhnawm
Europa League final-a inhmachhawnte hi Europe club lian tia chhiar tur an ni lo, amaherawhchu Ramón Sánchez Pizjuán-a inhmachhawn Eintracht Frankfurt leh Rangers te hian chanchin ngaihnawm an neih ve ve bakah champion duhin an tuihal.

Ṭan phat aṭangin inkhel pawh a nung a, Frankfurt an insiamrem rang zawk bakah an khelh dan a mumal zawk. Japanese midfielder Daichi Kamada-a'n Rangers tlarhnung a rum ṭhaih a, Djibril Sow-a'n keeper Allan McGregor a fiah bawk. German midfielder Ansgar Knauff leh Serbian midfielder Filip Kostic te pawhin goal khung theihna an nei bawk.

Rangers tan Joe Aribo-a'n first half-ah goal a khung teuh a, second half-ah khung ta nge nge. Minute 57-naah Aribo hian Frankfurt tlarhnung chet fuh tawk lo chu remchangah lain a tharum hmangin chance ṭha a insiam a, goal hmahruai a khung.

Frankfurt an beidawng lo a, siphurh sut tumin an nawr chhunzawm. Minute 69-naah Kostic-a cross chu Borre-a'n goal-ah a chantir a, 1-1 a ni. Rangers tlarhnung te an fimkhur tawk lo. Minute 90 chhungin Frankfurt an khel ṭha zawk a, goal dinhmun erawh 1-1 a ni.

Vanneihna chu
Extra time-ah pawh Frankfurt-in chance an nei hmasa zawk a, amaherawhchu second half-ah an tawm ta thung. Rangers-in chak theihna remchang a nei a, minute 118-naah Ryan Kent chuan hnai set sawt aṭangin chance ṭha bik nei mah se mak takin keeper Trapp-a'n a dang.

Rangers captain James Tavernier pawhin hun tawp hmain freekick aṭangin chance ṭha a nei a, goal-ah ṭha takin pet mah se keeper Trapp-a'n a dang. Extra time-ah pawh chak zawk an awm lo.

Penalty hmangin chak zawk zawn a ṭul a, Rangers player zinga hming langsar ber substitute Aaron Ramsey pet chu Trapp-a'n a dansak. Frankfurt erawhin an pet goal vek a, hun pangngaia goal khungtu Rafael Borre-a'n chakna goal a khung.

A ropui e
Frankfurt manager Oliver Glasner chuan, "A awihawm loh zawk. Europe-ah match 13 kan khel a, hneh loh kan tawng lo. Final-a ka naute khelh dan leh tun season chhunga an khelh dan hi thuin ka sawifiah thiam lo," tiin a sawi.

German club hian Chelsea leh Villarreal hnung zuiin hneh loh tawng loin an champion a, German club zinga inelnain Europa League hming a put hnua champion hmasa ber an ni bawk. Frankfurt hian June 2021 khan Oliver Glasner hi manager atan an ruat.

Glasner hian nipui transfer-ah ringawt player 13 zet a chhuahtir a, player 12 a lalut. Player lakluh zingah hian player pawimawh Borre, Knauff leh Jesper Lindstrom te telin nomawi an chawi nghal. Season tharah Champions League an khel ang.

A na thlawt
Rangers manager Giovanni van Bronc-khorst chuan, "Ka player-ten theihtawp an chhuah a, inkhelah pawh kan inhnehtawk. Nomawi kan chawi teuh takzet a, kan chak lo hi pawi kan ti takzet. Nomawi hi chuan hriat reng tlak sulhnu a hnutchhiah a, final-a chak loh erawh a na thlawt a ni," tiin a sawi.

Scottish club captain Tavernier chuan, "Final-a chak loh hi a nuam ngai lo. Mimal tin khelh dan kha a chhuanawm ka ti a, kan zinkawng pawh a ngaihnawm. Mahse a tawp kan khar thei lo a, hrehawm kan ti takzet a ni," tiin a sawi.

Rangers hian Celtic lakah Scottish Premiership an chân tawh a, chutihrualin nomawi chawi thei erawh an la ni. May 21, Inrinni zan hian Hearts nen Scottish Cup final-ah an inhmachhawn ang.