Curry hoin Golden State an chak

Luka Doncic ṭhatzia inhrilh nawn a ngai lo - mahse Dallas Mavericks star hi Golden State Warriors lamin an veng thei. Player ṭha bik Stephen Curry chu inbeihna muala chungnung zawk a ni leh ta a, point 21 neiin a team a chakpui.

Nimin zing NBA Western Conference final game 1 inkhelah, mualneitu Warriors lamin 112-87 in hnehna an chang. Inrinni zing dar 8:30 hian Chase Center, San Francisco-ah bawk game 2 an khel chhunzawm leh ang.

Golden State tan Curry-a'n a thiam thil a lantir, a bik takin quarter thumna tir lama 3-points a neih chuan sawi zui a hlawh. Court sirah amah aia palian pahnihin an hual, hawi let miah loin a hnung lamah ball a vawm vak - a ṭhianpa Draymon Green chuan a lo dawng chat.

Hawi lo mah se a ṭhianpa awmna tur hi a hre lawk, ball dawngtu Green chuan Curry lo tlan let chu a lo pe nghal a, ani hian nuam ti takin 3-points a vawm lut zui zat; player pahnih hi an khel dun rei tawh, an in man bakah hmunhnawm khawpin an khel dun thiam.

American guard Curry chuan, "Kan hnathawh tur tak kan thawk, kan khelmual kan venghim leh thei hi a lawmawm. Ruahmanna fel tak kan nei sa a, chumi kan tihhlawhtlin theih vanga chak kan ni," a ti.

Curry hian point 21 a neih bakah rebound vawi 12 a la bawk. Andrew Wiggins leh Jordan Poole ten pooint 19 ve ve an nei a, player dang pali - Klay Thompson (15 points), Green (10), Kevon Looney (10) leh Otto Porter Jr. ten an thawhhlawk bawk.

Golden State tan Curry hming langsar mah se, team thawhhona ṭha chu an chakna chhan a ni. An player zingah minute 13 khel tling pasarih ten point 10 an nei tling vek tihna a ni a, a bul ṭantu panga chauh ni loin player ṭha dang pawh an ngah tihna a ni.

GSW coach Steve Kerr-a'n Doncic dan dan tur a ruahmanna a hlawhtling. Doncic hian Utah Jazz an paltlang ṭumin match khata point 29 nei anga chawhrual a ni a, team ṭha Phoenix Suns lakah pawh 32.6 a nei phak.

Warriors lakah erawh tun season playoff china point a neih tlem ber (20 points) ṭum a tawng. Donic chuan, "Chawlhlawk hma inkhel kha kan thlir chuan hnehna chang turin theihna kan nei, mahse second half-ah erawh kan inthlau," tiin a sawi.

Tukin zing dar 6:00 hian Eastern Conference lamah finals game 2 an khel ve thung ang. Miami Heat chuan Boston Celtics lakah 1-0 in hma an hruai mek, best of seven series hmanga chak zawk zawn a nih avangin hmabak erawh an la ngah.

Western Conference Finals
Game 1:
Golden State Warriors 112 - 87 Dallas Mavericks
May 21, Inrinni
Game 2:
Golden State Warriors 08:30 AM Dallas Mavericks
May 23, Thawhṭanni
Game 3:
Dallas Mavericks 06:30 AM Golden State Warriors
May 25, Nilaini
Game 4:
Dallas Mavericks 06:30 AM Golden State Warriors
(Golden State hian series-ah 1-0 in hma an hruai)
Eastern Conference Finals
Game 1: Miami Heat 118 - 107 Boston Celtics
May 20, Zirtawpni
Game 2: Miami Heat 06:00 AM Boston Celtics
May 22, Pathianni
Game 3: Boston Celtics 06:00 AM Miami Heat
May 24, Thawhlehni
Game 4: Boston Celtics 06:00 AM Miami Heat
(Miami hian series-ah 1-0 in hma an hruai)
Note: Best of seven series hmanga chak zawk zawn a ni a, chak turin game li lak a ngai. Game hmasa pali fixture tihlan phawt a ni.)