Bang rinawm Kevin Trapp

Kum 2012 khan Kevin Trapp-a'n Eintracht Frankfurt tana a match hmasa ber a khel a, minute 19-naah hnawhchhuah a ni. German keeper Trapp hian hmun nghet a chan chhoh hnuah Paris Saint-Germain a pan a, league nomawi chawi bawk mah se French club tan chhuan tham sulhnu a nei lo.

Kum 2017-a Barcelona-in 6-1 zeta an lehthal ṭum khan PSG keeper chu Trapp hi a ni a, kum 2019-a Frankfurt-a a kir leh pawh khan tla chhia tiha sawi a ni. Mahse maw, tunah chuan sulhnu ṭha bik a hnutchhiah ta a, Europa League-ah Frankfurt a champion pui.

Trapp hi tun season-a Frankfurt player ṭha ber tiha chhal theih a ni a, Bundesliga leh Europa League-ah a khel ṭha ve ve. Nomawi an chawi theih nan Ryan Kent-a goal khung tur chu minute 118-naah a dan sak a, penalty shootout-ah Aaron Ramsey penalty pet a dansak leh

bawk. Frankfurt ṭantuten an theihnghilh tawh ngai lo ang.

Frankfurt champion puitu keeper Trapp chuan, "Keima pual bik a ni lo a, kan vai tan zan duhawm a ni. Player pakhat tih theih a ni lo a, team pumpui thawhrah a ni," tiin team hnathawh a nih thu a sawi thung.