Inkhel entu 50,000 zet!

Europa League final hi Ramón Sánchez Pizjuán, Seville-ah khelh a ni a, Eintracht Frankfurt ṭantu sing chuangin Spain an pan. Final-ah pawh hian kawr var nen an club ṭan Die Adler an thlawp ṭha hle.

Germany-ah pawh Eintracht Frankfurt hian ṭantu an nei ṭha a, an khelmual Deutsche Bank Park-ah mi 50,000 zetin final hi 'big screen'-ah an thlir. Penalty aṭanga Rafael Borre-a'n chakna goal a khung chiah pawhin Seville ang thoin Frankfurt-ah boruak a sang.

German club hian ṭantu an neih ṭhatzia hi Barcelona an hneh ṭum pawhin an pholang tawh a, Nou Camp-ah ticket 5,000 chauh chang mah se Frankfurt ṭantu sing thum vel zet an pungkhawm.

Barcelona technical secretary Jordi Cruyff pawhin, "Kan khelmuala khel kan ni chiah em, tih pawh ka hre lo," tiin Nou Camp-a an khelh vanga an dinhmun a ṭhat phah loh thu a sawi a, Barca boss Xavi pawhin, "Final ang mai a ni a, team pahnih ṭantu neih zat a inang," tiin a sawi.

Eintracht Frankfurt hi champion phuin khelmualah an che ṭha a, chutihrualin anmahni ṭantute khelmual pawnah an che ṭha. Europa League an champion theih nan an fan-te hi an che ṭha hle.