Mangṭha le, nghilh har hmangaih hmasa!

European football season-in tawp lam a pan hlawm a, nipui transfer a inhawng hnai a, player tam takin an club hmangih em em an mangṭha leh ṭan ta.

Player ṭhenkhatin club thar zawm turin mittui nen an club hmangaih an mangṭha a, a ṭhenin professional footballer ni leh tawh ngai lo turin khelmual an chhuahsan thung.

Player langsar zingah Giorgio Chiellini leh Paulo Dybala chuan Juventus an mangṭha a, Luis Suarez leh Erling Haaland pawhin club thar an zawm dawn a, Martin Škrtel leh Mark Noble te pawh an chawl ta.

Ngaihlai Chiellini
Italy defender Chiellini-a'n kum 2005 khan Fiorentina aṭangin Juve a zawm a, kum 17 chhungin Italian club tan Serie A nomawi pakua leh Coppa Italia nomawi panga a chawi hman.

Kum 37 mi centre back hi Serie A chauh ni lo, khawvel huap ang pawha defender ṭha ber pawl a ni reng a, a kum tam deuh tawh mah se inkhelh erawh chawlhsan mai a la tum lo - Major League Soccer lama kal tur anga sawi a ni.

Chiellini hi tun season-a an home game hnuhnung berah Juve-in an thlah a, Lazio nena inkhelah minute 17-naah club tana a kum hman zat hriatreng nan lakchhuah a ni a, club pahnih player leh fan-ten kut beng chungin an thlah.

Mittui nen Dybala
Kum 28 mi Dybala-a'n nipuiah Juve-a a contract a hmang zo tawh dawn a, Italian club-ah a cham chhunzawm dawn lo - Tottenham Hotspur, Inter Milan leh AS Roma nen sawizawm mek a ni.

Lazio laka Chiellini lakchhuah a nihin Dybala hi captain armband hren tir a ni a, inkhelh zawhah a ṭhianten boruakah an vawr kang a, mittui nen kum sarih a lo khelh tawhna Juve a thlah - Serie A (5) leh Coppa Italia (4) ah a champion pui.

Argentina international hian Juve tan inelna hrang hrangah match 292 khelin goal 115 a khungsak a, tun season-ah match 38 khelin goal 15 a khung tawh. Dybala chuan, "Juve jersey ha chung a, captain armband meuh hren phak hi ka nuna ka thil chhuan ber zinga mi a ni a, engtikah emaw chuan he thawnthu ngaihnawm hi ka tu leh fate ka la hrilh ve ka beisei," a ti.

Villa hellai Suarez
Barcelona-in ropui takin an thlah dawn emaw tih laiin, Luis Suarez-a'n duh loha hnawl hnu nichungin Atletico Madrid a pan a, season hmasa khan inelna hrang hranga match 38 khela goal 21 khung chungin La Liga champion a nihpui - kum sarih hnua an champion lehna hmasa ber a ni.

Mahse, tun season-a match 44 khela goal 13 khungtu hian nipuiah a contract a hmang zo tawh dawn a, Aston Villa nen sawizawm a ni mek - a ṭhianpa Steven Gerrard hnuaiah a khel mai thei.

Suarez-a'n Atletico-ah kum hnih chiah hun a hmang chungin Wanda Metropolitano stadium-a a match hnuhnung berah mittui nen Atletico a mangṭha a, Madrid khaw club ṭantuten, "Lucho, min champion pui avangin lawmthu kan sawi e," tih banner lian tak nen an mangṭha ve bawk - amah vangin season hmasaah La Liga champion an ni tih an hai lo.

Welcome Haaland
Borussia Dortmund-in tun season-a an match hnuhnung ber Signal Iduna Park-ah an khel a, Hertha Berlin chu 2-1 in an hneh - Haaland chuan a tihdan pangngaiin goal a khung a, penalty aṭanga a chhuih luh a ni.

Pound maktaduai 51.2-a Manchester City zawm tur Haaland hi inkhelh hmain a thlahna hun hman a ni a, inkhelh zawhah a ṭhianten guard of honour pe chungin an thlah bawk.

Kum 21 mi striker hian January 2020 khan Dortmund a zawm a, match 89-ah goal 86 a khungsak! Haaland chuan, "Dortmund jersey ka ha thei hi ka inchhuang takzet a ni," tiin a sawi.

Mangṭha Noble
Mr. West Ham an tih hial Mark Noble-a'n inkhelh a chawlhsan tawh dawn a, Hammers home game hnuhnung berah Manchester City a hmachhawn - an inhnehtawkpui a, mittui nen Noble-a'n fan-te a mangṭha zui.

West Ham tana match 549 kheltu hi Hammers khelmual hlui Upton Park bul lawka seilian a ni a, naupan tet aṭanga a club ṭan tana kum 18 a khel thei hi thil ropui bik a ni.

City nena an inkhelh hmain Noble-a jersey number 16 chuanna chu khelmualah pholan a ni a, minute 16-naah fan-ten Noble pualin kut an beng a, City lakah bench aṭanga luhtir niin, inkhelh zawhah chawimawina hlan a ni bawk.

Skrtel a chawl
Liverpool centre back hlui Martin Skrtel pawhin inkhelh a chawlhsan thu a puang a, kum 37 mi hi season ṭan dawn khan an ram, Slovakia club Spartak Trnava-ah a kir a, mahse, a hriselna dinhmun avanga a inkhelh zui zel theih loh thu a sawi.

Skrtel chuan, "Tun ang kum zata pawh hian tih theih tam tak ka la neiah ka inngai a, mahse, ka hriselna dinhmun avang zawkin khelh zel a rem lo. Ka hriselna dinhmun hian football mai ni lo, ka mimal nun thlengin a tibuai a, na nei loa hun ka hman hi ka hre meuh lo a ni. Tun hnaiah khan nachhawkna leh injection hmangin ka bei hram hram a ni," a ti a, a chawlh thu a puang.

Slovakia tana vawi 104 inlan thei Skrtel hian an ram club FK AS Trencín-ah a career ṭanin, Zenit Saint Petersburg, Liverpool, Fenerbahçe, Istanbul Basaksehir leh Trnava tan a khel a, Reds tan season kuaah match 320 khelin goal 18 a khung a, League Cup-ah chiah a champion pui - Zenit leh Istanbul tan league nomawi a chawi thung a, Slovak Footballer of the Year-ah vawi li zet thlan a ni.