Premier League: Tawpna niah eng nge thleng dawn?

Khawvela league ngaihven hlawh bera chhal ngam Premier League season chu khar a ni dawn ta a, May 22, Pathianni zan dar 8:30-ah Premier League club zawng zawngten match an khel vek dawn.

Tun season Premier League hian ngaihnawm leh ropuina danglam tak a nei a, chu chu match tawp ber khelh dawn thlenga engmah thil thleng chiang a la awm lo hi a ni.

Manchester City leh Liverpool ten champion an la tum ve ve a, Tottenham Hotspur leh Arsenal ten Champions League khelh an la tum a, Manchester United leh West Ham ten Europa League an la beisei ve ve a, Everton, Leeds United leh Burnley ten beisei an la nei vek bawk.

Champion tum
Hmahruaitu City leh Liverpool inkarah point khat chiah a awm. Pep Guardiola naute tan champion turin mikhual Aston Villa hneh a tawk a, Liverpool tan erawh Wolverhampton Wanderers an hneh a, Villa-in City an chelhsak a ngai bawk - a hautak hret.

Villa coach hi Reds legend Steven Gerrard a nih avangin Liverpool fan-ten an tana hna ṭha tak thawk turin Stevie G an beisei a, Villa hian Liverpool player hlui Philippe Coutinho leh Danny Ings an nei tel bawk.

City boss Pep chuan, "Midang inkhel kan ngaihven dawn lo a, theihtawp chhuaha chak kan tum mai dawn a ni," a ti a, Reds manager Jurgen Klopp chuan, "A thlen a beiseiawm loh a, mahse, thil theih chu a ni," a ti a, champion a la beisei ve fan bawk.

Hello top four?
Newcastle United-in Arsenal an hneh avangin Chelsea-in season tharah Champions League an khel dawn chiang a, Arsenal an buai ta thung - Gunners tan season thara Champions League khel turin Everton an hneh a, tla chiang tawh Norwich City laka Tottenham an tlawm a ngai.

Tottenham tan season thara Champions League khel turin Norwich inhnehtawkpui a tawk. Spurs leh Norwich hi inhnehtawk ta se, Arsenal chak pawh ni se Spurs hi goal difference-ah an la thlau hret a, Tottenham nena point hmuh zat inanga tlang tur chuan Everton hi 15-0 talin an hneh a ngai ang!

Gunners midfielder Granit Xhaka chuan, "Football-ah chuan engmah sawi lawk theih a ni lo a, beiseina kan nei tur a ni. Newcastle nen kan inkhelh hma khan kan kutah engkim a awm a, mahse, tunah chuan a danglam leh tawh. Football leh hringnunah chuan beiseina kan nei tur a ni," a ti.

Europa lam
Player lei nana an sum hman dan leh, player hlawha an insen zat thlir chuan Manchester United hi title fight nei tur an ni - mahse, tunah erawh season tharah Europa League leh Europa Conference League an khelh dawn tih chu zawhna a ni mek.

United hian West Ham nen season tharah European football an khel dawn chiang a, mahse, Europa nge ECL tih chu a la chiang lo - Red Devils tan season thara Europa League khel turin Crystal Palace laka chak a tawk.

West Ham tan Europa khel turin Brighton & Hove Albion an hneh a, Palace laka United-in point an hloh a ngai thung - Red Devils te hi inhnehtawk ta se, Hammers an chak chuan goal difference-a ṭha zawk West Ham an tlang ang.

Tu nge tla dawn?
Premier League aṭangin Watford leh Norwich City chu tla chiang tawh an ni a, team pakhatin Championship lamah an la zui thla ve leh dawn - he thu buatsaih lai hian Everton, Burnley leh Leeds United chu tla thei dinhmuna la ding an ni.

Everton hian nizan khan Palace an mikhual a, he thu buatsaih a nih lai hian result kan hre hman lo - an chak chuan an him ang. Burnley-in nizan khan Aston Villa an hneh chuan relegation zone an chhuahsan bawk ang.

He thu buatsaih a nih laia dinhmun ṭha lo ber chu Leeds United an ni a, midang result-ah an innghat tel tihna a ni - nizan result chu engpawh ni se, him turin Leeds hian Pathianni zana Brentford an lenchilh hunah chak an mamawh dawn.