KKR lakah Lucknow Super Giant an 'luck'

Indian Premier League tawp lamah boruak a sang a, a hmuhnawm tel bawk. May 18, Nilaini zan khan inkhel pawimawh bikah Lucknow Super Giant chuan run hnihin Kolkata Knight Riders an hneh a, ball tawp ber thlengin inkhel a hmuhnawm.

IPL club thar Lucknow an vanneih zarah playoff khel turin an tling a, KKR erawhin beisei tur an nei tawh lo thung. Tun dinhmunah Gujarat Titans leh Lucknow te playoff khel turin an tling tawh a, KKR bakah Chennai Super Kings leh Mumbai Indians ten playoff an khel dawn lo tih a chiang tawh bawk.

An invuak siak
Nvai Mumbai-a inkhelah Lucknow-in vuak hmasak an thlang a, opener pahnih Quiton de Kock leh KL Rahul te duhthusama ṭhain an khel. South African batter De Kock hian ball 70 aṭangin 140 runs a vaw chhuak a, six runs ringawt pawh vawi 10 a vua a, hetiang zat bawk hi four a vaw bawk.

A ropui lai chu De Kock leh a kawppui KL Rahul te hian an bat tluan. Lucknow captain KL Rahul hian ball 51 aṭangin 68 runs a siam a, De Kock a thlawp ṭha. KKR bowler-ten tihngaihna an hre lo a, Lucknow-in 210 runs an siam.

Hmuhnawm chu
KKR opener Venkatesh Iyer (0) leh Abhijeet Tomar (4) ten run tam siam loin pavillion-ah an kir a, mah se chak mamawh Kolkata club an beidawng lo.

Nitish Rana (42), Shreyas Iyer (50), Sam Billings (36) leh Rinku Singh (40) ten beiseina an rawn chhi nung. Over tawp berah 21 runs siam a ngai a, Rinku Singh-a'n four vawi khat leh six vawi hnih bakah run hnih siamin ball hnihah chak turin run thum chiah siam a ngai.

Mak tak maiin KKR dinhmun a ṭha ta zawk a, mahse bowler Marcus Soinis-a'n ball hnuhnung pahnihah Rinku Singh leh Umesh Yadav te a vawm hlum. Dinhmun derthawnga ding Lucknow-in hnehna an chang hram a, point hnih hlu tak hmangin playoff an khel dawn.

Engtin zel?
Nizan khan Royal Challengers Bangalore leh Gujarat Titans te an inkhel a, Titans hi an chak chuan Bangalore beisei a tawp ang. Bangalore hi an chak thung a nih erawh chuan Delhi Capitals tan playoff khel turin Mumbai Indians an hneh ve ngei a ṭul thung ang.

Zanin hian Rajasthan Royals leh Chennai Super Kings te an inkhel dawn a, Royals hi an chak a nih chuan playoff khel turin an tling dawn. Chutihrualin Royals hi chak ta lo pawh ni se NRR a ṭhat avangin playoff an tlin tho a rinawm.