French Open khel tur Osaka

Naomi Osaka chuan French Open a khel dawn, kum khat liam ta kha Paris khawpuiah hian hun hrehawm tak a lo hmang tawh - kuminah erawh beiseina thar nen tournament khelh theih ngei a inbeisei thung.

Japanese star Osaka hian rilru lam damlohna a nei a, media hmachhawn a hreh ṭhin. Nikum French Open khelh lai khan, player dangte ang bawkin hnehna a chan hnuah media hmachhawn tur a ni a, mahse a hmachhawn lo.

Inelna buatsaihtu lamin dan ang thlapin pawisa an chawitir a, a vawi hnih nan media a hmachhawn duh lo a nih chuan tlak tir theih hial a ni. Second round an khelh leh hmain Osaka hi a inhnukdawk ta zawk a ni.

Kum 24 mi Osaka chuan, "Ka ranking pawh ka siamṭha chho ve zel, tunah chuan a sang zual 50 zingah ka tel ve leh ta. Hei erawh lungawina tur a la ni lo thung, hmabak ka la ngah hle," tiin tun hma lama ranking sang a nihna ang tawn leh ngei a duh.

March thla kha chuan Osaka hi world number 78 a ni, tun hnaia ranking chhuak tharah chuan number 38 a ni leh tawh. Grand Slam atan erawh a ranking hi a la hniam, kum 2018 hnua a vawi khat nan seeded ni phak lo chungin major tournament a khel ang.

A khelh ṭhat tluan lai pawhin clay court hi Osaka tan hmun ṭha a ni ngai lem lo. Madrid Open khelh zawh takah pawh a thleng sang lo, a keartui a hliam bawk. French Open hma erawh chuan dam fel hman tura ngaih a ni.

Grand Slam vawi li champion tawh Osaka chuan, "Ka duh leh tum ang chuan ka la khel phak lo. Chutihrual erawh chuan match khelh tam hi ka thil mamawh chu a ni, training ṭha taka ka nei thei a nih phawt chuan beiseina ka nei ngam tur a ni ang.

"French Open-ah ka thleng sang ngai lo tih chu mi hriatsa a ni, kuminah pawh rinkai ka ni dawn lo. Rinkai ni lo chunga tournament khelh chu a nuam zawk, pressure nei miah loin kan khel thei dawn tihna a ni," a ti.

Grand Slam pali zinga pahnihna French Open hi May 26 aṭangin Paris khawpuiah an khel dawn. June thlaah Wimbledon khelh tur a awm dawn, chumi hnuah major tournament hnuhnung ber atan September thlaah US Open an khel leh ang.