Bungkawnin final an lut

Zothan Autoworks Pro Volleyball League-a hmeichhe inelna lam an inthlifim chho zel, match vawi thum an khelh tawhah chak vek Bungkawn chuan final an lut ta; table chung berah an awm tlang dawn tih a chiang tawh bawk.

Nilaini zan khan R. Dengṭhuama Indoor Stadium, Mualpuiah league round khelh niin, team ṭha Bungkawn hian Kanan chu 25-23, 25-22, 21-25, 25-12 in an hneh; match thum an khelh tawhah set hnih chiah an la hloh.

Bungkawn tan F. Lalparmawii a hmuhnawm chhunzawm, hnehna an chan theih nan point 21 a thawk chhuak - a zawna a vawi thum nan D3 Business Player of the Night atan an thlang, final-ah pawh a kutah an innghat thui khawp ang.

Inelna neih hnuhnung ber 2019 khan Bungkawn hi an khel ṭha tawh bawk, league round-ah ngam loh an tawng lo. Mahse, nomawi inchuhna inkhelah Durtlang an ngam lo, kuminah chuan season hmasa lama an chetsual tawhna ang hi thlen nawntir an tum lo ang.

Kanan hian an match hmasa berah Durtlang hneh thei mah se, tun hnaiah Bethlehem Vengthlang leh Bungkawn an ngam lo, final beiseina a tlem ta hle - midang inkhel result an ngaihchan a ngai tawh.

Final beiseina la nei Bethlehem VT chuan league round khar nan, tla chiang tawh Durtlang an la hmachhawn dawn. BVT tan final lut turin set khat lak a tawk, set la loa an tlawm a nih erawh chuan Kanan tan kawng an hawnsak thung ang.

May 18, Nilaini - Hmeichhia
Bungkawn 3 - 1 Kanan
(25-23, 25-22, 21-25, 25-12)
D3 Business Player of the Night: F. Lalparmawii, Bungkawn

May 23, Thawhtanni
Bethlehem VT 08:00 PM Durtlang

May 19, Ningani - Mipa
Hunthar 08:00 PM TNT

May 20, Zirtawpni
Chhinga Veng Spikers 08:00 PM Tuichangral

May 21, Inrinni
Durtlang North 08:00 PM TNT