FA Cup Last 16 ; Premier League club khingpui tur an nêm

Khawvela knockout football tournament upa ber FA Cup last 16 chu zanin aṭangin khelh ṭan a ni dawn a, Premier League club pariat la dam zingah inhmachhawn tur an awm lo.

Premier League hmahruaitu Chelsea chuan zanin dar 11:30-ah Wolverhampton Wanderers an lenchilh a nga, Sony Six-ah a en theih ang. Zanin dar 8:30-ah Manchester City chu Huddersfield Town khelmualah an lenglut dawn bawk.

Europa League round of 32 first leg a chak lo hlim Tottenham Hotspur chuan Pathianni zan dar 7:30-ah Fulham an hmachhawn zui ve leh nghal dawn bawk. FA Cup hi Sony Six HD leh Sony ESPN HD-ah te pekchhuah a ni bawk ang.

Zuam sual theih
Manchester City tan Hud­dersfield Town hi khingpui hautak tura ngaih an ni lo, chutih rualin Pep Guardiola naute tan Championship table-a pathumna ni mek Huddersfield hi zuamsual theih tur an ni. Kum 17 liam ta khan City hian Huddersfield an lo va lenchilh tawh a, 1-1 in an inhnehtawk - an intawn hnuhnung aṭanga tun inkarah thil tam tak erawh a danglam tawh.

Kar leha Champions League last 16 khel zui tur City hian an player ṭha ṭhenkhat an hahchawlhtirin a rinawm a, inlan lo tur langsar zingah rawlthar duhawm Gabriel Jesus chu a kephah ruh na vangin a inkhel thei dawn lo chiang a, tawn hriat ngah zawk Sergio Aguero a dam ṭha thung.

FA Cup vawi nga champion tawh City hi an nomawi chawi hnuhnung ber chu 2010-11 season kha a ni a, vawi li dang an champion ṭum chu 1903-04, 1933-34, 1955-56 leh 1968-69 season daih tawh kha a ni.

Hmanlai sawi chuan Hud­dersfield pawhin sawi tur an haihchham bik lo, kum 1922 khan FA Cup champion an lo ni tawh a, 1920, 1928, 1930 leh 1938 te khan final lutin pahnihna an ni thung, an sulhnu a nep lo.

Blues an dam
Antonio Conte nauten league match khelh hmabak 13 la nei chungin Manchester City lakah point riatin hma an hruai fal tawh a, zanina an mikhual tur Wolverhampton hi championship relegation zone aṭanga point ruk chauha him an ni thung, team pahnih dinhmun a inthlau takzet. Chutihruala hriat tel tur erawh chu Wolves hi Stoke City leh Liverpool te pet chhuaktu an nih miau avangin chak zawk tur sawi lawk a harsa.

Blues manager Conte-a'n tlarhnungah player pathum a rem aṭangin goal venhim kawngah team dang chunga leng an ni. Nikum September thla hnua match thum chiah la inlan captain John Terry kerek na a dam tawh a, Kurt Zouma leh Nathan Ake te pawh inkhel tura an inpeih tawh avangin rinrawl Gary Cahill leh Marcos Alonso te hahchawlhtirna hun ṭha a ni thei dawn.

Chelsea leh Wolves te in­tawn hnuhnung ber chu 2012 January kha a ni a, hun tawp dawna Frank Lampard goal hmangin Blues 2-1 in an chak hram. Chelsea hian 2009 khan league leh FA Cup an chawi kawp a, hemi hnuah club dang season khat chhunga champion kawp thei an la awm leh lo, Conte hnuaiah Blues hi nomawi pahnih chawi thei dinhmunah an ding mek.

Spurs fiahna
Champions League group stage an paltlang zawh loh hnuah Tottenham-in Europa League an khel zui a, Ningani zan khan round of 32 first leg khelin Belgian league-a pariatna Gent lakah 1-0 in an tlawm, goal awmchhun hi French striker Jeremy Perbet khung a ni. February 23 khian Wembley-ah second leg khelh a ni ang.

Mauricio Pochettino enkawl Spurs hi lungngaia indawm kun hman an ni lo. Pathianni zana an hmachhawn tur Fulham hi Championship-a pariatna nilai an ni. Fulham hian 2011 khan Spurs hi 4-0 ngawtin an lo hneh tawh a, last 16 lut tur hian Premier League club Hull City 4-1 a an sawp theih bawk avangin inrintawkna an nei sang dawn.

Inkhel tur dang
League One club Millwall chuan Inrinni zan dar 8:30-ah Premier League champion Leicester City an lo mikhual dawn a, league lama talbuai mek Foxes hi Champions League khelh hmabak an nih avangin Claudio Ranieri-a'n a player chhawr rim loh zawkte tan khelhna hun a siamsak tura ngaih a ni.

Leicester manager Ranieri chuan, "Derby kan hneh ṭum khan player naupang zawkte an inlan tam a, tun ṭumah pawh hian an tan hmun ka siamsak leh ang. FA Cup leh Champions League khelh a ngai a, chutihruala kan ngaihpawimawh ber pakhat chu league a ni," tiin nomawi chawi ai mahin division hniama tlak loh chu a ngaihpawimawh thu a sawi.

Oxford chuan an club chan­china a vawi hnih nan last 16 an lut a, an khingpui tur hi Middlesbrough an ni. Newcastle 3-0 a hnehtu Oxford hian kum 53 hnua a vawi khat nan Wembley luh an tumruh hle.

Oxford boss Michael Apple­ton chuan, "Ka naute hnenah thil thleng tawh chanchin tam tak ka hrilh dawn a, football thawnthu thar ziak ngei thei turin kan inbuatsaih dawn a ni," tiin a sawi.