Wenger la chawl dawn lo

Arsene Wenger chuan season tharah team en­kawl hna a la thawh chhunzawm zel dawn. Wenger hian kum 20 chuang Arsenal a enkawl chhunga a dinhmun chian loh ber ṭuma ngaih a tawng mek a, nimina a hmalam hun an zawhnaah chawlh a la thum loh thu a sawi chhuak.

Kum 67-a upa Wenger chuan, "Engpawh nise season tharah chuan Ar­senal a ni emaw, hmun dangah a ni emaw team en­kawl hna chu ka la thawk chhunzawm ang," tiin a la chawlh loh tur thu a sawi.

French manager-in North London club tana contract a neih lai hi tun season tawp rualin a tawp tawh dawn a, tun dinhmunah hian Premier League hmahruaitu Chelsea chu point riatin an phak lo a, Champions League last 16 first leg-ah Bayern Munich khelmual Allianz Arena-ah 5-1 in an tlawm hlim bawk - FA Cup bak beisei an nei tawh loa ngaih a ni.

Premier League ma­nager zinga hna ngai chelh rei ber ni mek Wenger chuan, "March emaw April thlaah emaw ka hma hun hi ka ti chiang ang. Mipui vantlang hmuh theiha hna thawk kan nih avangin sawiselna leh fuihna hi chu kan tawk turah ka ngai, kan hnathawh tawh aṭanga hmasawnna nei turin mi thusawi pawh kan ngaitha tur a ni," a ti.

Kum 1996 aṭanga Arsenal enkawl tawhtu chuan sawi chhunzawmin, "Ka chhuak a nih pawh­in Arsenal hian inkhel zawng zawngah hnehna an chang vek dawn tihna a ni chuang lo. A pawimawh ber chu he club hian hmalam a pan zel theihna tur hi a ni. Gunners hi ka hmangaih a, hun lo kal zel tura dinhmun ṭha a chan theihna tur hi ka ngai­pawimawh," tiin a sawi.

Wenger hian a hmalam hun atan ni lo, result ṭha an neih theihna tur zawkin inpumkhatna leh fan-te puihna an mamawh thu a sawi tel bawk.