East Bengal an rawn thleng

I League hmahruai mektu East Bengal chuan Thawhṭanni tlai dar 2:05-a Aizawl FC hmachhawn turin nimin khan Aizawl an rawn thleng.

Kolkata club-ah hian Mizo tlangval pahnih Lalrindika Ralte leh Robert Lalthlamuana te an tel a, foreign striker thar Christopher Payne chu hming langsar zinga mi a ni.

Kolkata club an ṭha

East Bengal hi India rama football club lar ber zinga mi ni mah se I League ṭan a nih hnuah an la champion lo. Red and Gold hian champion ngei tumin sum pawh an seng nasa hle.

Kolkata club hian season hmasaa Aizawl FC captain David Lalrin­muana an lalut a, East Bengal-ah khelhna hmun a la chang lo - thilmak erawh a ni lo. Red and Gold-ah hian 2014-15 I League player of the season atana thlan Jackichand Singh pawh an lalut a, Manipuri winger hi season ṭan tirh lamah inlan mah se match hnuhnung pathumah squad-ah dah a ni tawh lo.

East Bengal hian season ṭan hmain South Korean striker Do Dong-Hyun chu an duhkhawp loh avangin a contract an tihtawp sak a, Australian forward Chris Payne an lalut leh tawh bawk.

Kolkata club tan foreig­ner pathum Trinidadian forward Willis Plaza, Haitian midfielder Wedson Anselme leh Ugandan defender Ivan Bukenya ten season ṭha tak an hmang vek bawk.

Red and Gold-in tun season-a goal 18 an khung zinga goal 14 hi foreigner pathum Plaza (6), Anselme (5) leh Bukenya (3) te khung a ni. East Bengal hian goal khung turin an player hlui Robin Singh chu an la let a, feet ruk leh inches khata sang striker hian goal hnih a khung tawh bawk.

East Bengal tan season liam taa inhliam vanga an chhawr tam theih loh Lal­rindika Ralte a dam tawh a, Lunglei tlangval Didika hian captain armband hrengin hmun pawimawh a chang. Goan midfielder ṭha Rowllin Borges meuh pawhin khelhna hmun a chang tam lo.

Mizo club hun

Aizawl FC hian East Ben­gal hi season liam ta khan vawi hnih an hneh lo a, RG Stadium-a an chak loh danah erawh referee thutlukna vangin sawi zui a hlawh hle.

Tun season ṭanna inkhelah Mizo club leh East Bengal hi Kolkata-ah an inhnehtawk a, Red and Gold hi a draw tu zawk an ni. Match kua khelh tawhah Aizawl FC (17 pts) hian East Bengal hi point li chiahin an pha lo a, Thawhṭannia inkhel tur hi a pawimawh dawn a, RG Stadium-ah entu an ṭha ang.