Messi leh Barca an inṭhen lo ang - Mascherano

Barcelona defender Javier Mascherano chuan Lionel Messi leh Barca chu nupa hlim tak ang mai an nih thu leh an inṭhen mai a rin loh thu a sawi. Argentina captain Messi hi Barcelona-ah contract thar a ziah lawk loh avangin chhuak tur anga sawi thawm a ri ring hle a, Mascherano erawhin a chhuah a ring lo.

Liverpool midfielder hlui Mascherano chuan, "Messi leh Barca hi rei tak chhung nupa hlim taka lo awm dun tawh ang mai an ni a, chu chu a tawp mai ka ring lo. Messi leh Barca hian an inkawp hi an hlawkpui ve ve a, a tupawh hian in kal­san an hreh avangin Leo hi a chhuak mai lo ang," tiin a ṭhianpa chuan Nou Camp-ah contract thar a ziah a ring hle.

Mascherano chuan Ar­gen­tina tan pawha a khelhpui Messi chu club ai pawha a len zawk thu sawiin, "Leo hi player danglam bik a ni a, a chanchin kan sawi hi chuan khawvela player ṭha ber chung­chang kan sawi tihna a ni. Club hi a pawimawh ber tih chu thil chiang a ni a, he club aia lian players an awm a thiang lo. Leo chauh lo chu," tiin a ṭhianpa chu a khelh mekna club ai pawha lian zawk niah a ngai.

Champions League a Paris Saint-Germain laka mualpho hlim Barcelona hian Pathianni zan dar 1:15-ah league match an khel leh tawh dawn a, Leganes an mikhual ang.