Ronaldo aiin Benzema a ṭha zawk

Champions League a Napoli an hmachhawn ṭuma goal khungtu Karim Benzema chuan Real Madrid-a a khelhpui Cristiano Ronaldo aiin Champions League goal scoring rate a nei ṭha zawk! Portugal forward hian Champions League-ah goal 95 khung tawhin Europe club inelnaa goal khung hnem ber ni mah se minute 122 dana goal khung zel ang a ni a, Benzema hian minute 120 dan zela khung ang a ni thung.

France international Benzema hian Champions League-a goal khung hnem lamah players pali chiah phak loh a nei tawh a, minutes per goal-ah pawh players pali tho phak loh a nei. Lionel Messi chuan Champions League-ah hian goal 93 khung tawhin minute 99 dana goal khung ziah ang a ni a, minutes per goal-ah a ṭha ber.

Argentina captain hnuai­ah hian Mario Gomez awmin German striker hi minute 102 dana goal khung zel ang a ni a, Champions League-a a goal khung zat erawh 26 bak a ni lo. Ruud Van Nistelrooy chu minute 109 dana goal khat zel khung ang niin goal 56 a khung tawh a, Filippo Inzaghi chuan goal 46 khungin minute 119 dana goal khung ang a ni.

Pangana Benzema hian tun season La Liga-ah match 16 khel tawhin goal nga chiah la khung mah se Champions League-ah erawh match sarihah goal nga a khung tawh a, sawisel hlawh striker hi Zinedine Zidane-a'n a rin chhunzawm zel dawn em tih chu zawhna awm a ni. Real hian zanin dar 8:45-ah league match khel turin Espanyol an mikhual ang.