NBA All-Star Game LeBron James Vs Stephen Curry
Basketball ngainatuten thlir nuam an tih 2017 NBA All-Star Game chu New Orleans Pelicans Court, Smoothie King Center-ah Thawhṭanni zing dar 6:30-ah khelh a ni dawn a, Sony Six-ah a en theih ang.
NBA inelna kar laka neih ṭhin All-Star Weekend chu tukin zing aṭang khan neih ṭan a ni a, NBA All-Star Celebrity Game leh Compass Rising Stars Challenge hmanga bul ṭan a ni. Pathianni zing dar 6:30 aṭangin mimal inelna pathum - Skills Challenge, Three-Point Contest leh Slam Dunk te neih a ni dawn.
All-Star Weekend khar nan Eastern Conference leh Western Conference te an inhmachhawn dawn. Eastern Conference hian Cleveland Cavaliers forward LeBron James an nei a, Western Conference lamin Golden State Warriors guard Stephen Curry an neih bawk avangin NBA All-Star Game hlutna a san phah sawt.
Skills Challenge
Skills Challenge-a inel tur hian player pariat thlanchhuah an ni a, Philadelphia 76ers center Joel Embiid a inhliam avangin Denver Nuggets center Nikola Jokic-a'n a thlak. Player dang pasarih te chu Anthony Davis (New Orleans Pelicans), Kristaps Porzingis (New York Knicks), DeMarcus Cousins (Sacramento Kings), Gordon Hayward (Utah Jazz), Devin Booker (Phoenix Suns), John Wall (Washington Wizards) leh Isaiah Thomas (Boston Celtics) te an ni.
Nikum khan Minnesota Timberwolves center Karl-Anthony Towns chu pakhatna a ni.
Three-Point Contest
Three-Point inluh siakah hian pakhatna ni lai chu Golden State Warriors guard Klay Thompson a ni. Kumin hian Thompson hian inelna hi a hmachhawn leh dawn a, Golden State guard hi C. J. McCollum Portland (Trail Blazers), Kyle Lowry (Toronto Raptors), Eric Gordon (Houston Rockets), Kyrie Irving (Cleveland Cavaliers), Kemba Walker (Charlotte Hornets), Nick Young (Los Angeles Lakers) leh Wesley Matthews (Dallas Mavericks) te nen an inel ang.
Slam Dunk Contest
Minnesota Timberwolves guard Zach LaVine chuan inelna hnuhnung pahnihah a zawnin Slam Dunk Contest-ah pakhatna a ni a, kuminah erawh a inlan dawn lo. Tun ṭuma hian nikuma vanduai taka LaVine tluk lotu Aaron Gordon (Orlando Magic) bakah Glenn Robinson III (Indiana Pacers), DeAndre Jordan (Los Angeles Clippers) leh Derrick Jones Jr. (Phoenix Suns) te an inel ang.
All-Star Game
NBA All-Star Game vawi 66-naa Western Conference coach tur chu Golden State Warriors coach Steve Kerr a ni a, Warriors-in an conference-a record an neih ṭhat ber vang a ni. Eastern Conference-ah Cleveland Cavaliers-in record nei ṭha ber mah se coach Tyronn Lue chu nikum lama a inlan tawh vangin Eastern lam ho tur hi Boston Celtics coach Brad Stevens a ni.
Kuminah hian a vawi khat nan inkhel bul ṭan tur hi fans chauhin an thlang lo a, media leh NBA player nilai ten an thlang. Mipui lam hian 50% an chang a, media leh NBA player-te hian 50% dang hi a inzatin an insem thung.