I League a ngaihnawm Mohun Bagan tan insiamthat hun

Vawiin tlai dar 4:35-ah Mohun Bagan chuan I League match khel turin DSK Shivajians an mikhual dawn a, Mumbai laka goal khung thei lo Kolkata club tan insiamṭhatna remchang a ni. Mizo tlangval Jeje Lalpekhlua'n, "Champion kan duh a, kan duhna hi khelmualah lantir kan tum ang," tiin Vanglaini palai hnenah a sawi a, an chung chiaha awm East Bengal um phakna remchang a ni.

Shillong Lajong forward Samuel Lalmuanpuia'n East Bengal nen an inhnehtawk ṭumin Meghalaya club tana goal awmchhun a khung a, Zemabawk North rawlthar hian, "Striker niha goal khung loh reng chuan boruak a sang ṭhin a, tunah chuan inrintawkna nen khelmual ka lut thei tawh ang," tiin Vanglaini palai a hrilh a, Mizo striker che rang tak hi Pathianni zana Chennai City an lenchilh hunah en bik a sual lo ang.

Chak duh Jeje

Mohun Bagan-in match riat khelh tawhah tlawm hmel la hmu lo mah se zaninah hnehna an chang zo lo a nih chuan an chung chiaha awm East Bengal an thlah fal dawn tihna a ni a, Sanjoy Sen-a nauten hei hi thlentir an duh lo ang. Bagan striker Jeje chuan, "Point thum hmuh tumin theihtawp kan chhuah ang a, tawlhthluk a thiang tawh lo. DSK hi team ṭha tak ni mah se hneh ngei kan tum dawn a ni," tiin a sawi a, point thum hmuh ngei a duh.

Mumbai FC lakah goal khung lo mah se Mohun Bagan hian tlarhmaah league match riata goal ruk khung tawh Darryl Duffy, Haiti international Sony Norde, Japanese winger Katsumi Yusa leh Jeje te an nei a, goal khung turin theihna an nei tih a chiang. DSK tlarhnungah Jerry Lalrinzuala leh Sairuatkima te an fimkhur a ṭul ang. Pune club hian Bagan hmachhawn turin Jerry Rinzuala leh Sairuata bakah hian Jerry Mawihmingthanga, K. Lalṭhathanga leh Lallianzuala Chhangte an hruai ang.

Balewadi Stadium-a an intawn hmasak ṭumin goal awm loin an inhnehtawk a, North Korean striker Kim Song-yong chu Kolkata club tan a hnawksak a, Mariners hi an vannei zawk.

Mumbai hmaah Bengaluru

Champion lai Benga­luru-in match nga chhung chak hmel an hmu tawh lo a, zaninah Mumbai FC an lenchilh dawn. Bengaluru boss Albert Roca-a'n Aizawl FC an draw hnuah champion beiseina a la bo loh thu a sawi a, Bagan draw hlim Mumbai coach Santosh Kashyap-a'n season ṭantira a thusawiah a la din reng thu a sawi bawk - pathumna aia hniama awm a tum lo.

Bengaluru left back Sena Ralte chuan, "Kan chak hleithei lo a, eng team pawh hmachhawn ila kan khel tawk em em vek zel mai hi chu hriatthiam a har a ni. Mahse, team boruak a ṭha a, players kan inngeih a, Mumbai khawpuiah point thum hmuh ngei kan tum a ni," tiin Vanglaini palai a hrilh.

Sree Kanteerava Stadium-ah Blues hian Santosh Kashyap hote hi 3-0 in an sawp tawh a, amaherawhchu Bengaluru hian Cooperage Stadium-ah hnehna an la chang ngai lo.

Shillong harhna

Thangboi Singto enkawl Shillong Lajong-in an match hmasa pathumah a zawna tlawm hmel an hmuh hnuin league match rukah vawi khat chiah tlawm hmel an hmu a, harhtharna an chang mek. Lajong tan Samuel Lalmuanpuia leh Isaac Vanmalsawma ten inkhel bul an ṭan leh ngei a beisei­awm a, Chennai City hi coach thar V. Soundararajan hnuaia insiamthar mek niin tlarhmaa Brazilian striker Marcos Vini­cius hi ven tham a ni.

Mizo striker Samuel Lal­muan­puia chuan, "Chennai City hi huphurh hran lo mah ila game tin hi kan tan chuan a pawimawh em em vek a, hnehna chan ngei tumin kan khel ang. Hmasawnna tur tam tak kan la nei a, ka mimal tak pawhin theihtawp ka chhuah chhunzawm zel a ni," tiin Vanglaini palai a hrilh a, Chennai khawpuiah point thum hlawhchhuah loh a duh lo.

Lajong hian Shillong-ah Chennai City hi 2-0 in an hneh a, hemi ṭum hian I League-a goal sarih khung tawh Aser Pierrick Dipanda Dicka-a'n goal hnih a khung.