Kerber chak lo nghal

World number 2 Ange­lique Kerber chu Qatar Open aṭanga vuak chhuah nghal a ni. Australian Open hnua a match hmasa berah Russian tleirawl Daria Kasatkina lakah 6-4, 0-6, 6-4 in a tlawm.

German nula Kerber hi first round-ah a bye a, second round aṭangin inelna a hmachhawn ṭan. Ningani zan khan inlanin ruah sur leh khaw hnawngin a tihbuai karah a tlawm.

Grand Slam vawi hnih champion tawh Kerber hian Janaury thla khan Sydney International last 16-ah Kasatkina hi 7-6, 6-2 in a lo ngam lo tawh a, kum 19-a upa lakah kumin chungin vawi hnih a tlawm der tawh.

Season hmasa Aus­tralian Open leh US Open champion Kerber hian kuminah beisei a la phak lo chho zel a, tournament pali khel tawhin nomawi a la chawi lo. Australian Open-ah last 16 bak a thlen zawh loh avangin Serena Williams lakah world number a nihna pawh a hloh leh tawh.

Kum 29-a upa Kerber chuan, "Ka chet fuh lo ni a ni a, chutihrualin Kasatkina khan a khel ṭha em em thung. Chawlh ka mamawh a, ka chawlh hnuah pawh ka khelh dan phung pangngaia ka la khel chhuak thei lo hi inenfiah ka ngai hle," tiin a sawi.