Pusarla Venkata Sindhu a sang zel
Badminton World Federation-in ranking an tihchhuah thar berah Pusarla Venkata Sindhu chuan point 69399 hmuin pangana a ni a, badminton a khelh hnua a tawn san ber ṭum a ni. World number 12 ni chungin season bul ṭan mah se kum khat chhungin hma a sawn takzet.
Indian Shuttler zingah world number 1 pawh lo ni tawh Saina Nehwal chu a sang 10 zinga lang phak a ni bawk a, London Olympic bronze medalist Saina hi number 9 a ni thung. Kum 26-a upa Saina dinmun a hniam chhan phakhat chu season hmasa khan hliam vangin inkhel pawimawh tam takah a inlan thei lo.
Kum 21-a upa Sindhu erawhin nikum khan a hun tawn ṭha ber a tawng a, Indian hmeichhe zinga a hmasa ber ni turin Rio Olympic-ah silver medal a la a, China Open-ah hlawhtlinna changin a vawi khat nan Super Series title a la a, Syed Modi International Grand Prix-ah a champion bawk.
Hyderabad nula Sindhu chuan, "Nikuma bul kan ṭan tirh khan world number 5 ka nih phak mai hi ka la beisei ngai lo, ka theih tawp ka chhuah chhunzawm zel dawn a, kumin chhungin number 3 nih hman ngei ka tum," tiin hmalam pan zel a tum thu a sawi.
Indian shuttler mipa zingah Ajay Jayaram chu ranking sang ber niin world number 18 a ni a, mixed doubles pair Pranaav Jerry Chopra leh Sikki Reddy te chu number 14 niin mipa doubles team Sumeeth Reddy leh Manu Attri te chu number 24 an ni thung.