A hun a thleng dawn ta - tu nge champion dawn?
Premier League season hmawr bawk hun a thleng dawn ta a, champion kan hre tawh dawn - tun dinhmunah chuan champion thei tur team pahnih an awm a, an hming chu Manchester City leh Liverpool a ni.
City leh Liverpool inkarah point khat chiah a awm a, hmabak match khat chiah a awm tawh. Pep Guardiola naute tan champion turin chak a tawk a, Liverpool tan hnehna chan a, City an chetsual a ngai bawk.
A tawi zawnga sawi chuan City chu dinhmun ṭha zawk an ni a, mahse, vawi khat chetsualah engkim la danglam thei a nih avangin Reds tan beiseina hloh a thiang bik lo.
Manchester City hian Pathianni zan dar 8:30-ah Aston Villa an mikhual dawn a, Liverpool hian Pathianni zan dar 8:30-ah vek Wolverhampton Wanderers an mikhual dawn bawk.
Gerrard an au che...
Liverpool fan-ten an player ropui bera an ngaih chu Steven Gerrard a ni a, 'Captain Fantastic' tia hminglem meuh an pek midfielder ropui ṭhin hi tunah chuan Villa coach a ni tawh.
Reds ṭantuten Steven Gerrard an au a, City chelhsak turin an duh - a hmangaihte kohna hi a chhang thei dawn em? Pathianni zanah hriattirin kan awm dawn e.
Gerrard chuan, "City tan harsatna thlen ngei kan tum a, kan theihna zawng zawng nen kan bei ang. Kan season kharna niah kan fan-te hlimna thlen kan duh a ni," a ti.
Rangers boss hlui hian City hneh a châk ang tih a chiang a, Gerrard leh Liverpool fan-te beisei ang hi a thleng thei a nih ngat chuan football thawnthu ngaihnawm zingah a tel dawn.
Mahse maw...
Stevie G-a'n theihtawp an chhuah tur thu a sawi a, mahse, Villa hi inkhel chau an ni a, Etihad Stadium-a leng tur an ni bawk a, an tan a harsa dawn tih a chiang. Villa hian Ningani zan khan Burnley chu 1-1 in an inhnehtawkpui.
Villa an inkhelh chauh lai hian team ṭha zawk City erawh Pathianni zana West Ham an inhnehtawkpui hnuah an inlan leh tawh lo a, hahdam taka awm chungin Villa an mikhual thei dawn.
Gerrard chuan, "Manchester City hmachhawn tur hian inpuahchahna hun kan nei tam tawk lo a ni," a ti a, squad pan zawk an nih sa bawk si avangin City laka Villa chak tura dah chu thil harsa tak a ni.
Hetihlai hian City-in chanchin lawmawm an neih belh - player inhliam John Stones leh Kyle Walker ten club training an zawm leh tawh a, Reuben Dias chu season tawp thleng inlan thei dawn lo mah se Aymeric Laporte chu a 'fit' bawk.
Hello Stevie
Liverpool boss Jurgen Klopp chuan a player-ten Steven Gerrard an biak thu a sawi! German coach chuan, "Mihring vek kan ni a, Stevie hian City laka serious turin ka biak kher a mamawh lo tih ka hria.
"Keimah tih loh, kan club chhung amite chuan Stevie hi an be vek tawh hialin ka ring a, mahse, kei chuan ka ti ve lo," a ti a, Villa puihna an mamawh avanga Gerrard biak a tum lo.
Klopp chuan sawi zawmin, "Mainz emaw Borussia Dortmund puihna remchang match nei ta ila, ka pui em em ang. Mahse, ka inkhel tawh lo a, Gerrrard pawh a inkhel tawh lo," a ti a, coach-in a tih theih chin a hria.
German coach chuan sawi zawmin, "Aston Villa-in chak tumin an khel dawn a, mahse, City khelmuala lenluh hi chu a harsa ṭhin.Villa leh City inkhel tur ka ngaihtuah lo a, hemi ringawt ngaihtuah hi Wolves zah lohna a ni," a ti.
A chiang lo
Liverpool-in player inhliam an nei a, Mohamed Salah, Vigil van Dijk leh Fabinho an inhliam vek - player ṭha bik vek an ni a, anni pathum inlan lo hi Reds tan a pawi thui thei dawn.
Klopp chuan, "Ka player-te dinhmun a ṭha a, Wolves laka an inlan dawn leh dawn loh ka sawi thei lo. Mo hian risk lak a duh lo a, mahse, hliam serious tak erawh a ni lo. An inkhelh theih loh pawhin bench-ah tal an awm thei ang. An thei ta lo a nih pawhin kan hnual phah dawn lo a, an inlan dawn leh dawn loh hi 100% in ka sawi ngam lo," a ti.
Salah a inlan theih loh chuan Sadio Mane, Luis Diaz leh Diogo Jota ten tlarhma an luah leh ngei ang a, midfield-ah Thiago Alcantara, Jordan Henderson leh Naby Keita an inkawp thei ang.
Tlarhnungah VVD awm lo ta se Joel Matip leh Ibrahima Konaté an inkawp a ngai dawn tihna a ni a, defender pahnih hi VVD 'class' ni lo mah se an rintlak tih hriat a ṭha.
City vs Villa
Villa tana City hnehna chance ṭha ber chu tlarhnunga beh thlap a, counter-attacking football hmanga nawr let a ni - mahse, Steven Gerrard-a game thlirin tlarhnunga beh thlap hi an nei tlem hle!
Mahse, Villa hian a pawng a taka chak an tum chuan City aṭanga nawr let turin an player hlui Raheem Sterling/Jack Grealish, Gabriel Jesus leh Riyad Mahrez an awm tih hriat a ṭha.
Midfield-a Kevin De Bruyne leh Bernardo Silva awm tur ringawt pawh hi Villa tan manganpui tham a ni a, Villa goal nawr tur dang chat turin Rodri a la awm dawn cheu bawk.
Villa tan City laka point hlawh chhuak turin Philippe Coutinho, Danny Ings leh Ollie Watkins an pawimawh dawn a, City goal nawr na tak dang turin Tyrone Mings leh a ṭhiante an ṭangkai bawk ang.
Pawisa hi
Khawthlang media ṭhenkhat tarlan danin City hian Premier League nomawi an chawi chuan Grealish-a man an pek belh a ngai dawn a, pound maktaduai 15 bawr vel a ni!
Villa tan City hneh loh hi a hlawk zawk thei tihna a ni - chutihrual chuan Villa hi tlawm ta se, 14-naah season an khar dawn tihna a ni a, an chak chuan team dang result a zirin 10-na pawh an ni thei.
Gerrard-a team-te hian 10-na dinhmun luah ta se, pound maktaduai 24.2 an dawng dawn - 14-na ni ta se pound maktaduai 15.4 an dawng ang. Chet ṭhat dan a zira an sum dawn hi, hmun khata an sanin pound maktaduai 2.2-in a sang zel a ni.
He pawisa hi league-a an chet ṭhat dan a zira an sum dawn tur chauh a ni a, broadcasting leh thil dang aṭanga an dawn tur a tel lo - City an champion chuan £44m an dawng dawn a, Liverpool-in £41.8m an dawng ang.
Playoff chance!
Premier League-ah hian an point, goal difference leh goal khung zat a inang a nih chuan head to head bika an point hmuh leh away-a goal khung tam zawk en leh tur a ni. Man City leh Liverpool te hi head to head-ah an intluk chiah.
Chutihrualin tun hnaiah City-in goal an khung tam avangin champion tur zawnna playoff erawh a thlen theih a beiseiawm ta lo. Aston Villa-in Man City 6-0 in an hneh a, Liverpool leh Wolves 5-5 a an inhnehtawk a nih chuan champion zawnna playoff a awm ang.