Sangliana hmachhawn tur Fela

Mizoram Wrestling Association chuan May 17-19 chhung khan Serchhip-ah Mizo Palian champion lai Lalsangliana hmachhawn tur zawnna an nei a, Salem Veng tlangval Lalnunfela a chak ber.

Fela hian East Lunglai inchai chak Lalrinawma leh Serchhip chhuanvawr Raymond Lalthansanga te a hneh a, Sangliana laka phuba lakna remchang a nei dawn. Salem Veng tlangval Fela hi 120 kg-a rit a ni a, kum 2011-2014 chhung Mizo inchai chak ber a ni.

Fela hian Mizo inchai chak ber ni turin kum 2011 khan Kolasib inchai chak F. Lalhmingmawia (L) a hneh a, kum 2014 khan Upper Republic tlangval Sangliana'n a chhuhsak. Sangliana hian hun rei tak chotu a hmuh loh hnuah amah hmachhawn thei turin Fela a rawn ding chhuak leh dawn a, MWA chuan ruah tui hul hunah Lammualah Mizo inchai chak ber hi an zawng ang.