Thil mak beiseitu Arsenal

Arsenal tan Champions League khel tur chuan thil mak a thlen a ngai, manager Mikel Arteta chuan, "Everton kan hneh a ngai, inelna hi a la zo lo. Football-ah chuan eng pawh thleng thei a ni," tiin beisei an la neih thu a sawi.

Gunners tan palina ni phak turin Toffees hneh ringawt a tawk lo. Pathianni zan dar 8:30 inkhel dangah Tottenham chu tla chiang tawh Norwich City lakah an tlawm tel a ngai. Antonio Conte tan erawh UCL ticket nei turin point khat lek hmuh pawh a tawk.

Arteta naute hmachhawn tur Everton hi inhamtang hlim an ni, kar laihawla inkhel an nih avangin an chau dawn - North London club erawh kar tluana inbuatsaihna nei an ni a, chak tura rinkai an ni ang.

Amaherawhchu, Frank Lampard-a naute hi an boruak ṭhat lai tak a ni. Phur leh thatho taka Emirates Stadium an pan a nih erawh chuan hmachhawn an awlsam lo ang, an player neih dan chhut chuan point thum hmu thei tur an ni ve tho.

Arsenal beiseina a tlem viau lai hian Tottenham tan erawh hna a hautak lo tura ngaih a ni. Spurs tum tur Norwich hi Premier League season kal laia goal chhuah hnem ber (79 goals) an ni a, table mawngphah luahtu an ni hi an inhmeh hle.

Harry Kane leh Son Heung-min neitu North London club hian goal khat aia tam an khung a rinawm. Golden Boot dawn beiseitu Son-a'n goal 21 a khung tawh a, a chunga awm Mohamed Salah a phak lohna chu goal khat chauh a ni.

South Korea international hian goal a khung belh a nih chuan top scorer a ni thei dawn. A elpui Salah hi hliam vanga chawl lai a ni a, an match hnuhnung berah a inlan lo ang - Asian tlangval zinga EPL Golden Boot dawng thei hmasa ber ni turin goal khat chiah a mamawh.

Hei erawh hriat tel a ngai, Son-a hi a ṭhianpa Kane hian tun thleng chuan remchang a la siamsak duh lo. An match hnuhnung pahniha penalty an hmuh pawh a kian lo, tun hmain a teammate Christian Eriksen goal khung pawh ama khung anga ennawn diltu a nih avangin Kane mizia chu hriatsa a ni.

Son hian mimal lawmman a dawng duh a nih chuan penalty tel loa a khung leh mai a ngai dawn, tun season league goal 21 a khung tawh pawh hi penalty a tel miah lo - team nem leh tlarhnung pawp laka goal khat neih belh hi a harsa lo ang.