Pathumnaah Tuchel a lawm

Chelsea chuan Premier League-ah pathumna dinhmun an humhim ta a, manager Thomas Tuchel chuan an midfielder pawimawh N'Golo Kante chhawr mumal thei lo chunga pathumna nih chu thil mak a nih thu a sawi bawk.

Blues hian Ningani zan khan Leicester City chu 1-1 in an inhnehtawkpui, mikhual Foxes tana James Maddison goal chu defender Marcos Alonso hmangin an sut a, goal dang a lut zui tawh lo.

Tuchel chuan, "Kante hi thil danglam thlentir ṭhintu a ni a, hliam vangin tun season-ah match tam tak a khel thei lo. Kan match zawng zawng aṭanga chhut chuan 40% chauh a khel, ani tel loa pathumna kan ni thei hi thil mak a ni," tiin Kante pawimawhzia a sawi.

Club neitu chung-changah Chelsea hi an buai mek a, an vanneih kum ni se chuan nomawi chawi thei dinhmunah an ding. League Cup leh FA Cup final lut mah se, penalty-ah Liverpool an ngam lo, boruak rit takin a tuam vel kara pathumna nih hi lawmna tur a ni ang.

Premier League season khar nan Pathianni zan dar 8:30 hian Stamford Bridge-ah Watford an mikhual ang.